Ish-kryeministri i arrestuar pakistanez, Imran Khan, është nominuar për Çmimin Nobel për Paqen për kontributin e tij për të drejtat e njeriut dhe demokracinë gjatë qeverisjes së tij.
Emërimi u njoftua nga anëtarët e Aleancës Botërore të Pakistanit (PWA), një grup avokues i themeluar dhjetorin e kaluar, të cilët operojnë brenda partisë politike norvegjeze Partiet Sentrum.
“Ne, në bashkëpunim me PWA, kemi nominuar z. Imran Khan, ish-kryeministër i Pakistanit, për Çmimin Nobel për Paqe, për punën e tij mbi të drejtat e njeriut dhe demokracinë në Pakistan”, tha partia Partiet Sentrum në rrjetin social X. Çdo vit, Komiteti Norvegjez i Nobelit merr qindra nominime, pas së cilës zgjedh fituesin përmes një procesi të gjatë tetë mujor.
Khan, themeluesi i partisë kryesore opozitare të Pakistanit, Pakistani Tehreek-e-Insaf (PTI), është në burg që nga gushti i vitit 2023. Këtë janar, ai u dënua me 14 vjet burg me akuza për shpërdorim të pushtetit dhe korrupsion.
Ky ishte rasti i katërt i madh ku ish-kryeministri dënohej. Gjykatat rrëzuan ose pezulluan tre dënime të mëparshme lidhur me shitjen e dhuratave shtetërore, zbulimin e sekretit shtetëror dhe martesën e paligjshme.
Ai u arrestua për herë të parë në lidhje me çështjen Al-Qadir Trust në maj 2023, duke kaluar më pak se dy ditë në paraburgim. Arrestimi çoi në protesta në të gjithë vendin, gjatë të cilave mbështetësit e Khan u revoltuan në disa qytete.
Khan humbi pushtetin pas një votimi mosbesimi në parlament në prill 2022. Ai mohon të gjitha akuzat, duke i quajtur ato trillime politike. /tesheshi.com/
