Sekretari amerikan e Tregtisë, Wilbur Ross, i njohur si një multimilioner, ka shkaktuar një furtunë reagimesh pas një deklaratë të tij në lidhje me qindra nëpunës federal, të cilët kanë mbetur pa paga prej javësh, për shkak të bllokimit të paprecedent të qeverisë pas mosmarrëveshjeve mes presidentit Trump dhe demokratëve, për financimin e murit me Meksikën.
Ai është cilësuar si një “njeri i pandjeshëm” për zyrtarët të cilët nuk marrin një pagë prej 22 dhjetorit, kur në televizionin CNBC, tha se nuk e kupton se “pse ata po shkojnë në kuzhinat e supës për t’u ushqyer, ndërkohë që mund të marrin kredi me norma të ulëta interesi”.
Deklarata e tij provokoi kritika të dy emrave demokratë në Kongres, Nancy Pelosi dhe Chuck Schumere.
“Një deklaratë e tillë dëshmon për indiferencën mizore të qeverisë ndaj zyrtarëve të saj”, tha Schumer, ndërsa Nancy Pelosi komentoi se Ross u tregua si “djali babait”, referuar të birit të presidentit Trump, Eric, dhe bashkëshortes së tij Lara, të cilët një ditë më parë apeluan për durim e sakrificë nga ana e 800 mijë zyrtarëve pa paga.
Ross u krahasua me mbretëreshën franceze Marie Antoinette, e cila në vitin 1789, në prag të revolucionit, tha duke u referuar shtresave të varfëra se “në qoftë se ata nuk kanë bukë, le ta hanë tortë”.
Nusja e djalit të Trump, Lara tha se ajo ka simpati për 800 mijë punonjësit e sektorit publik të cilët nuk marrin paga për shkak të bllokadës së qeverisë së SHBA, por që sipas saj, “situata rezulton është më e rëndësishme se çdo individ”.
Ndërsa i shoqi Eric Trump, tha ngjashëm: “nuk është e drejtë për ju dhe ne të gjithë e kuptojmë këtë, por është shumë më e rëndësishme se çdo individ”.
Senati i SHBA, natën e të enjtes nuk arriti të miratojë një propozim ofruar nga Trump, i cili parashikonte heqjen e bllokimit të pjesshëm për autoritetet federale.
Miratimi kërkonte 60 vota, ndërsa republikanët kishin 53 nga 100 vende në Senat.
Bllokada aktuale e pjesshme e qeverisë, është më e gjatë në historinë amerikane.
Në zemër të konfliktit është një mur që Donald Trump kërkon të ndërtojë në kufi me Meksikën, për të cilin kërkon më shumë se pesë miliardë dollarë, por demokratët refuzojnë të nënshkruajnë për një të tillë kompromis të buxhetit. /tesheshi.com/
