Përfaqësuesi special i Bashkimit Evropian për dialogun ndërmjet Serbisë dhe Kosovës, Miroslav Lajçak, të martën i ka dorëzuar kryenegociatorit të Kosovës, Besnik Bislimi, propozimin e ri nga Brukseli për zgjidhjen e krizës në veri të Kosovës.
Për momentin nuk ka detaje për përmbajtjen e propozimit të ri, ndërsa burime të Radios Evropa e Lirë (RSE) pohojnë se gjithçka po bëhet me synimin për të gjetur të paktën një zgjidhje të përkohshme për të shmangur përshkallëzimin e frikshëm të tensionit pas 21 nëntorit.
Pas kësaj date, autoritetet kosovare kanë paralajmëruar gjoba për pronarët e automjeteve me regjistrime serbe në Kosovë nëse nuk i riregjistrojnë në targat e Republikës së Kosovës (RKS).
Tensionet e reja mes Serbisë dhe Kosovës shpërthyen pasi afati i caktuar nga Qeveria e Kosovës për zbatimin e vendimit për zëvendësimin e targave të lëshuara në Serbi dhe të përdorura nga serbët në Kosovë skadoi në mesnatën e 31 tetorit.
Autoritetet serbe e shohin atë vendim si shkelje të një marrëveshjeje të mëparshme sipas së cilës targat, me rekomandim të Misionit të Kombeve të Bashkuara në Kosovë (UNMIK), duhet të kenë shenjën neutrale KS, e jo RKS, për të cilën insiston Qeveria e Kosovës.
“Kriza më e rëndë që nga viti 2013”
SHBA-ja dhe BE-ja më herët i kanë bërë thirrje Qeverisë së Kosovës që të shtyjë zbatimin e masave për dhjetë muaj, gjë që iu përgjigj me vendim për zbatimin gradual deri më 21 prill.
Serbët kanë vendosur të largohen nga institucionet e Kosovës, të tërhiqen nga Qeveria, Kuvendi dhe administrata lokale në Veri, si dhe nga Gjyqësori dhe Policia e Kosovës, derisa Prishtina zyrtare të tërheqë masat për riregjistrim dhe të formojë një komunitet të komunave serbe, për të cilën u angazhua në Marrëveshjen e Brukselit të nënshkruar në prill 2013 nën kujdesin e BE-së.
Sipas njohurive të RSE, propozimi i ri nga Brukseli nuk përjashton mundësinë që një nga vendimet e mundshme të jetë shtyrja e aplikimit të gjobave për një periudhë të caktuar, edhe pse “jo domosdoshmërisht” për dhjetë muaj.
Në rast se Qeveria e Kosovës i përgjigjet pozitivisht këtij propozimi, pritet që Lajçak menjëherë të udhëtojë për në Beograd, për të zyrtarizuar marrëveshjen e të dyja palëve për zgjidhjen e krizës aktuale.
Kreu i diplomacisë evropiane, Josep Borrell, vlerësoi të hënën se tensionet aktuale mes Serbisë dhe Kosovës janë “kriza më serioze që nga viti 2013” dhe bëri thirrje që një zgjidhje të gjendet para 21 nëntorit. /tesheshi.com/
