Nga Blendi Gashi
Dy ditë pas Prokuroria në Kosovë ngriti aktakuzë për rastin “Pronto”, Kadri Veseli, partia e të cilit është në qendër të skandalit, nuk ka bzajtur akoma.
Siç dihet akuzat bien mbi sërë zyrtarësh të lartë të PDK-së, ku veçohen ish-deputeti Adem Grabovci si personazh kryesor; ministri aktual i Inovacionit, Besim Beqaj; deputetit Zenun Pajaziti, Njazi Kryeziu, këshilltari i Kadri Veselit.
Ky i fundit, para zgjedhjeve parlamentare të 11 qershorit premtoi nisjen e një standardi të ri, atë të mosfutjes në lista zgjedhore të personave nën hetim, për çka e la jashtë listës për deputet Grabovcin.
Por ky është vetëm një rast. Tashmë Veseli, në vijim të “standartit të ri” duhet të shprehet dhe për tre personazhet e tjerë nën hetim, njëri prej tyre edhe këshilltar.
Nëse tashmë të akuzuarit nuk dorëhiqen apo nuk lirohen nga detyra, Veseli nuk ka më kurrfarë të drejte të flasë për “standardin e ri”.
Përveç kësaj, ai nuk guxon të hesht edhe për faktin se edhe personalisht është pjesë e aferës “Pronto”, me ç’rast duhet të tregojë pse nuk është në mesin e të akuzuarve.
Përveç Veselit deri më tani ka heshtur edhe presidenti Thaçi, që po ashtu është pjesë e “Pronto”-s. Edhe pse jashtë akuzave, ata konsiderohen kokat e këtij megaskandali.
Kujtojmë se hetimet e Prokurorisë Speciale ndaj Adem Grabovcit dhe disa zyrtarëve të tjerë të PDK-së nisën vitin e kaluar, kur portali Insajderi publikoi përgjimet në të cilat dëgjoheshin zyrtarët e shtetit duke bërë pazare me vende pune në sektorin publik. Grabovci bashkë me Thaçin, Veselin, Beqajn etj., caktonin nëpër pozitat e larta publike militantë të PDK-së. /tesheshi.com/
