Vendimet e Gjykatës së Strasburgut mbi pronat, janë tashmë halli më i ri, por dhe më i madh i qeverisë Rama. Ministri i Financave, Arben Ahmetaj, dha alarmin se buxheti mund të përballet me një faturë marramendëse nga vendimet Strazburgut, nëse sipas tij nuk hyn në fuqi i ligji i ri i pronave.
“Mënyra se si është menaxhuar çështja sot mund të sjellë një risk nga Strazburgu i cili mund të kalojë, nëse ne nuk bëjmë gjënë e duhur, në mbi 1 miliard dollarë në 2-3 vitet e fundit. Ky do të jetë risku më i madh që mund të kalojë 99 për qind të qytetarëve shqiptarë”, tha Ahmetaj.
“Ligji i pronave i bërë nga qeveria, i kaluar në Parlament dhe që aktualisht ndodhet në Gjykatën Kushtetuese, nuk është perfekt por bën zgjidhjen më të mirë të mundshme duke adresuar këtë risk”, shtoi kreu i Financave shqiptare.
Ligji i pronave pritet të shqyrtohet nga Kushtetuesja, pas kthimit nga Presidenti që e ka konsideruar si antikushtetues, nisur dhe nga kundërshtitë e forta të shoqatave të pronarëve. Dhe nëse Kushtetuesja e rrëezon, atëherë qeveria shqiptare pritet të tronditet nga një tërmet i madh financiar nga Strasburgu, siç dhe ministri Ahmetaj e ka paralajmëruar. /tesheshi.com/
