Në Stamboll është promovuar, edhe nën lot, një libër kushtuar një prej periudhave më të rënda për shqiptarët e Kosovës e të trojëve të tjera, atë të pas-Luftës së Dytë Botërore, ku si pasojë e politikave anti-shqiptare të Beogradit, u tentua një spastrim etnik pa armë, ku shumë shqiptarë u detyruan t’u ikin politikave përndjekëse shoviniste duke u zhvendosur në Turqi. Dhe janë pikërisht ata që krijuan komunitetin më të madh të shqiptarëve atje, ku sot numërohen në afro 5 milion.
Libri “Kujtesa kolektive: dëshmi dhe ngjarje (1944-1966)”, është përgatitur nga një grup autorësh: Memli Krasniqi, Hysen Matoshi, Nuridin Ahmeti, Sonila Boçi, Ledia Dushku dhe Shpend Avdiu. Botimin e tij e mori përsipër Instituti Albanologjik në Prishtinë.
Disa nga autorët shpjeguan përmbajtjen dhe rëndësinë e tij. Por momenti më i veçantë i aktivitetit promovues ishte ai kur Nijazi Straja, më i moshuari i këtij takimi, ish-i burgosur politik dhe bashkëveprimtar i Adem Demaçit, dhe njëherësh i intervistuar në librin e ri, nuk mundi t’i ndalë lotët kur kujtoi historinë dhe ndau kujtime mbi atë që kanë përjetuar shqiptarët dhe ai me shokë në veçanti gjatë asaj periudhe dhe shpërnguljen e tij në Turqi në fillimin e viteve ’50. /tesheshi.com/
