Shqiptaro-amerikani Gjon Junçaj, njeriu që u investuan për Reformën në Drejtësi si prokuror federal, tha se SPAK-u dhe BKH-ja do ta bëjnë shumë të vështirë për zyrtarët e lartë që të përfshihen në akte korrupsioni.
Duke folur për VOA-n në shqip, Junçaj tha se pas SPAK-ut janë SHBA.
“Ky është SPAK-u! Nuk është vetëm tetë apo 10 prokurorë, është më shumë se kaq. Mendoj se ky është një hap i parë i rëndësishëm, për të cilin u desh shumë kohë për të arritur deri këtu. Por po aq e rëndësishme mendoj është, nëse pyesni prokurorët në Shtetet e Bashkuara ose në Shqipëri, ata do t’ju thonë se kemi nevojë për këta hetues dhe ky është hapi tjetër që duhet të presim. Shtetet e Bashkuara, Departamenti i Drejtësisë në bashkëpunim me Departamentin e Shtetit do të jenë atje për të ndihmuar në këtë proces”, tha prokurori federal shqiptaro-amerikan.
Sipas tij, gjithçka duhet të nisë nga drejtësia.
“Informacioni më i rëndësishëm që unë kam marrë, ka ardhur nga vetë njerëzit atje. Por jo çdo fjalë në rrugë, nëse mund të shprehem kështu, është e vërtetë. Mirëpo, në kushtet kur rinia shqiptare largohet nga vendi, në një shkallë që është më e lartë se në çdo vend tjetër në Evropë, kjo në vetvete thotë gjithçka që ju duhet të dini, se cilat janë problemet në rrënjë. Dhe mendoj se ato të çojnë gjithmonë tek politika dhe sistemi i drejtësisë që nuk u ka shërbyer qytetarëve ashtu siç duhej. Kështu që shpresoj se po ecim përpara. Ndërsa reforma përparon, Shtetet e Bashkuara dhe partnerët e tyre në Bashkimin Europian do të ndihmojnë që ajo të kryhet ashtu siç duhet, që gjërat të përmirësohen”, arsyetoi Junçaj.
Ai veçoi dhe nisjen e misionit nga ambasadorja Kim si mjaft përcaktues në këtë aspekt.
“Ajo çfarë është inkurajuese për mua aktualisht është se Shtetet e Bashkuara e kanë përforcuar misionin e tyre duke dërguar ambasadoren Kim në Shqipëri. Jam i sigurt se ambasada e SHBA-së do të vazhdojë me përpjekjet e saj për të përkrahur dialogun mes të gjitha palëve dhe individëve që janë të përfshirë në këto çështje, për të gjetur një zgjidhje rreth kësaj apo çështjeve të tjera që mund të dalin”, tha Junçaj. /tesheshi.com/
