Projekti i Qeverisë: 10 milionë euro për punime restauruese në Gjirokastër

Pazari i Gjirokastrës, një vend mjaft i vizituar jo vetëm nga turistët e huaj, por edhe për të bërë blerje, pritet t’i nënshtrohet restaurimit me fonde të financuara nga qeveria shqiptare dhe fondi shqiptaro-amerikan i Zhvillimit.

Detajet e para të projektit të publikuara nga një aktivitet promovues sugjerojnë se plani ka për qëllim ruajtjen e trashëgimisë kulturore dhe  zhvillimin e zonës si atraksion turistik.

Ministrja e Kulturës, Mirela Kumbaro theksoi se në korrik të 2013 shteti shqiptar rrezikonte të merrte nga UNESCO damkën e turpit për mungesë të plotë vëmendje, përgjegjësie dhe zbatimi të ligjit të trashëgimisë. “Morëm përsipër atë që premtuam, t’i kthejmë Gjirokastrës statusin e kurorës së krenarisë shqiptare. Por ne Gjirokastrën do ta bëjmë më të mirë se Korçën, Niko”, iu drejtua ajo zëvendëskryeministrit Niko Peleshi, ish-kryebashkiak i Korçës.

Ky i fundit, i inkurajuar duket nga fjalët e Kumbaros, tha se “kur ne futemi me projekte në një qytet, nuk e lëshojmë atë qytet pa arritur standardin e një qyteti europian”.

Sipas tij, për këtë arsye janë investuar 10 milionë euro në Gjirokastër, me projekte nga parku i Viroit, shëtitorja, bulevardi dhe 30 rrugica. /tesheshi.com/