Nga Blendi Gashi
E filloi punën si praktikane në Gjykatën e Qarkut në Prishtinë në vitin e largët 1983 dhe më 2 shtator 2015 arriti kulmin e karrierës: u emërua zëvendëskryeprokurore e shtetit të Republikës së Kosovës nga kryeprokurori i Shtetit, Aleksandër Lumezi.
Është zëvendëskryeprokurorja e parë e Kosovës dhe në këtë post, sipas Kryeprokurorisë Shtetit, u emërua falë përvojës, angazhimit, përkushtimin të treguar për punë dhe rezultateve të mira , duke përfshirë edhe përvojën udhëheqëse që ka pasur si zëvendëskryeprokurore dhe më pas edhe u.d. kryeprokurore e Prokurorisë Speciale të Republikës së Kosovës.
Është kjo Sevdije Morina, e cila gjatë viteve ushtroi edhe disa pozita të larta, si zëvendëskryeprokurore e Prokurorisë Speciale, anëtare e Këshillit Gjyqësor të Kosovës etj.
Njihet si një ndër prokuroret më të mira të Kosovës, por njëkohësisht një grua tepër serioze dhe e ‘rreptë’.
Si anëtare e Këshillit Prokurorial të Kosovës ajo është përplasur në vazhdimësi me ushtruesin e detyrës së Prokurorit të Shtetit, Sylë Hoxha. Këtë të fundit e quajti shkaktar të dëmtimit të sistemit prokurorial.
Nuk la pa e akzuar edhe ministrin e Drejtësisë, Hajredin Kuçi, për të cilin tha se është ai që po e mban në pushtet Hoxhën.
Disa nga akuzat e Morinës bërë ndaj Sylë Hoxhës i cili ishte u.d. i Kryeprokurorit të shtetit:
“Hajredin Kuçi po e mban në pushet Sylë Hoxhën”
“Sylë Hoxha nuk ka as kredibilitet as të drejtë morale t’i drejtohet qytetarëve sepse ai është shkaktari më i madh i dëmtimit të sistemit prokurorial”.
“Te çështja e nxehtë e ‘verifikimit nga AKI’, ka një falsifikim në procesverbal”.
Po kush është Sevdije Morina?
Zëvendëskryeprokurorja e parë e Kosovës, lindi në fshatin Mramuer të Prishtinës,. Ajo diplomoi në Fakultetin Juridik pranë Universitetit të Prishtinës në vitin 1982, ndërsa provimin e judikaturës e kreu në vitin 1984.
Që nga shkurti i vitit 1983 deri në shkurt 1984 punoi si praktikante në Gjykatën e Qarkut në Prishtinë; nga shkurti 1984 deri në mars 1985 punoi si përkthyese nga gjuha serbo-kroate në gjuhën shqipe dhe anasjelltas, në po të njëjtën gjykatë.
Si bashkëpunëtore profesionale, po ashtu në Gjykatën e Qarkut në Prishtinë, punoi nga marsi deri në korrik të vitit 1985.
Postin e zëvendësprokurorit në Prokurorinë e Qarkut në Prishtinë e mbajti nga korriku i vitit 1985 deri në shtator 1990. Në periudhën, maj deri shtator 2003, punoi si bashkëpunëtore profesionale në Prokurorinë Publike të Kosovës.
Ndërsa si Prokurore Publike në Prishtinë, ka shërbyer nga shtatori 2003 deri në shkurt 2010. Aktualisht, ajo mban postin e zëvendës kryeprokurorit të Prokurorisë Speciale të Republikës së Kosovës. Për më tepër, ajo gjithashtu është edhe anëtare e Këshillit Gjyqësor të Kosovës.
Sevdije Morina, është pjesëmarrëse në shumë konferenca, seminare e punëtori të ndryshme, si dhe pjesëmarrëse në trajnime të shumta, brenda dhe jashtë vendit, duke përfshirë edhe vizita studimore në vende të ndryshme të botës. /tesheshi.com/
