Nga Ylli Pata
I sapoemëruari nga kryeprokurori Adriatik Llalla në drejtimin e seksionit më të rëndësishëm për momentin, atë që do të pastrojë shtetin nga të korruptuarit, nuk i përket një gjenerate “djaloshare” siç janë një pjesë e madhe e zyrtarëve të drejtësisë. Por as nga “babaxhanët” që vijnë nga jurisprudenca komuniste.
Blerim Tominaj, një 57-vjeçar i ardhur nga Peshkopia që në fillimin e viteve `90-të, i përket brezit të juristëve që e kanë nisur këtë profesion jo si zanat, por ndoshta si vision, passion, e kush e di.
Ai i përket një formimi intelektual që me dy fakultete të kryera nuk ka aspak gjë prej “Plepave” si një pjesë e gjyqtarëve e prokurorëve të pas `90-s.
Ai i përket një familje fisnike dibrane që qytetarinë e ka në gen dhe para se të mësojë procedurën penale, Tominaj e njeh përsosmërisht kodin qytetar të mirësjelljes.
Megjithatë, Blerim Tominaj, prej më shumë se 7 vitesh ka qenë prokurori që ka prekur me dorë çështjet “më të zjarrta” që politika i ka qëlluar me artilerinë më të rëndë.
Si prokuror i Tiranës, Tominaj mori në dorë “pataten e nxehtë” të 21 Janarit 2011 dhe përfundoi në dosjen ku i cilësoi si autorë të qitjes me armë zjarri zinxhirin komandues të Gardës së Republikës ndaj 4 qytetarëve në Bulevardin “Dëshmorët e Kombit”.
Më pas, Tominaj ka hetuar çështje të tjera të nxehta dhe me peshë. Ajo për rastin e të ndjerit Sokol Olldashi ishte e parafundit nga të mëdhatë. Ndërsa më pas, Tominaj bashkë me 3 kolegët e tij menaxhuan çështjen e nxehtë “Doshi-Bami”, ku në zyrën e tij u morën në pyetje krerët më të lartë të shtetit dhe politikanë të kalibrit të rëndë si: Edi Rama, Ilir Meta, Sali Berisha, Tom Doshi, Mark Frroku etj.
Largimi i ish-gazetarit Eugen Beci, solli komandimin për një kohë të Adnan Xholit në krye të Prokurorisë së Krimeve të Rënda. Gjatë kësaj kohe, Tominaj është trajnuar me intensitet për dosjet e rënda të korrupsionit dhe pastrimit të parave.
Në krah do të ketë edhe kolegët europianë dhe amerikano-shqiptarin Gjon Juncaj. Një barrë e rëndë është vendosur në shpatullat e Blerim Tominajt, pasi ka gjasa të kthehet në një “Falcone” shqiptar. Kush e ka zgjedhur, ka marrë për bazë integritetin, thjeshtësinë dhe jetën e përkorë që Tominaj dhe familja e tij bën prej vitesh…/tesheshi.com/
