Ka dhe këndvështrime të tjera për situatën në Maqedoni, ku fjala “krizë” përjashtohet. Madje gjithçka konsiderohet si normalitet i bazuar në ligjet e vendit dhe Kushtetutën.
Kështu gjykon profesoresha universitare, dhe njëherit eksperte juridike, Mirjana Najçevska, pas tentimit të pasuksesshëm të mandatarit Nikolla Gruevski, liderit të VMRO-DPMNE, për formim të qeverisë së re në afatin ligjor prej 20 ditë pas pranimit të mandatit. Por kjo sipas saj nuk është krizë; është një zhvillim normal politik që rregullohet nga Kushtetuta. Gjërat janë të qarta në këndvështrimin e saj: Presidenti i shtetit, Gjorgje Ivanov, në këtë situatë ia dorëzon mandatin për formimin e qeverisë partisë së radhës me më tepër deputetë, në rastin konkret, LSDM-së.
“Aspak nuk mendoj që për momentin ka krizë politike, ka mënyrë demokratike, procedura me baza mbi të cilat shkohet më tej. Kur një parti ose koalicion partiak nuk mund të sigurojë shumicë përkatëse parlamentare për formim të Qeverisë, kalohet në tjetrën, nga e cila pritet që mund ta formojë atë shumicë parlamentare. Hapi logjik është t’i jepet mandati partisë më të madhe të radhës, dhe ajo të tentojë të formojë shumicën. Nëse edhe ai opsion politik nuk mund të formojë, atëherë mund të mendohet në drejtim të zgjedhjeve të reja, ose për formimin e qeverisë teknike ose teknokrate”, vlerëson profesoresha Najçeska.
Që pas përfundimit të zgjedhjeve në dhjetor, Maqedonia nuk e formon dot qeverinë. Partia fituese, VMRO nuk i ka mandatet e mjaftueshme. Ndërsa kushtëzimet e palës shqiptare nëpërmjet një Platforme të Përbashkët hartuar në zyrën e Edi Ramës në Tiranë, është shndërruar në sfidë për faktorin politik maqedonas. Gruevski e humbi shansin që të formojë qeveri, e tani mandati duhet t`i kalojë Zaevit nga kahja opozitare, ose në një intepretim tjetër kushtetues, nr. 2 në VMRO, ku gjasat janë për kreun aktual të diplomacisë së Shkupt Nikola Poposki. /tesheshi.com/
