Arrestimi i Ramush Haradinajt nga francezët në llogari të Serbisë, ka riaktivizuar në opinionin shqiptar, një lloj antipatie për politikën e Parisit zyrtar karshi karshi çështjes kosovare, ku herë në mënyrë të kamufluar e herë haptazi, është rreshtuar krah Beogradit. Francezëve iu atribuohet edhe plaga më e madhe kosovare e pasluftës, Mitrovica e ndarë, pasi ishin trupat e tyre në kuadër të KFOR-it që lejuan serbët ta bllokojnë për vite të tëra Urën e Ibrit.
E tashmë ata i kanë vënë prangat një prej ish-krerëve të UÇK-së, Ramush Haradinajt, i pastruar tërësisht nga akuzat pas një “skaneri” gjyqësor në Hagë. Dhe e gjitha kjo pas një urdhër-arresti serb. Ministria e Jashtme franceze është deklaruar së fundi se arrestimi nuk është politik, gjë që pak besohet nga opinioni, aq më tepër kur në këtë mes janë francezët, e aq më tepër që dhe ekspertë juridikë të huaj kanë argumentuar nonsensin juridik të arrestimit të Ramushit.
Ndërkohë, është rasti këtu të kujtojmë që anti-kosovarizmi francez ka startuar që në zjarrin e luftës. Bëhet fjalë për Pierre-Henri Bunel, spiunin francez që arriti të vonojë për 6 muaj bombardimin e Serbisë nga NATO. Dhe të llogarisësh së sa jetë shqiptarësh u humbën e u shkatërruan për 6 muaj derisa ndërhyri Aleanca Atlantike, e cila detyroi më së fundi Serbinë që të tërhiqet nga Kosova, duke ndalur njëherësh dhe dëbimet masive e masakrat.
Rasti i spiunit francez, sqarohet më së miri nga gjeneralmajori serb, Jovan Millanoviç.
Ky i fundit është mbështetur tek majori francez Pierre-Henri Bunel, pjesë e inteligjencës franceze, i cili kishte siguruar skicat për shënjestrat e sulmit të aeroplanëve të NATO-s.
Në botimin e plotësuar të librit të tij “Serbia dhe NATO”, Millanoviç thotë se që më 1995 ishte ngarkuar me detyrë që të ishte spiun në Bruksel, në selinë e NATO-s, por nën postin zyrtar si këshilltar-ministër në ambasadë. Ai shkruan se i ishte ngarkuar detyra që të ndërtonte një rrjet informimi që do të zbulonte planet e NATO-s, sipas asaj që shkruan Kurir.
Dhe për këtë thotë se e ka ndihmuar ushtaraku i sipërpërmendur francez.
“Informacionin e parë që kam pasur nga ai e kam kontrolluar në dy ose tre anët, dhe pastaj kam filluar t’i jap detyra. Ai u fut në lojën e spiunimit, shumë i sinqertë dhe i vetëdijshëm për të gjitha pasojat”, thotë Millanoviç, i cili thekson se përgatitjet për sulm në NATO janë bërë gati që më 1998 dhe se vendimi për sulm është marrë më 12-13 tetor.
Këto informata e këto plane të NATO-s ia kishte dërguar Bunel atij në banesë.
“I kemi analizuar në mbrëmje dhe pastaj u ndamë duke menduar se që të dy atë natë do të arrestohemi. Për mua atëherë nisi ferri. Çfarë të bëj me letrat? Ku të shkoj në ora 11:30? Si t’i mbartja ato? Dola te dalja nga kontejnerët. Hodha një qese e tjetrën e mbarta. Në Ambasadë kam përpunuar dokumentet, siç kërkon procedura, dhe i dërgova në Beograd”, thotë ai, duke shtuar se në bazë të këtyre informatave u bë ripozicionimi i forcave serbe. Pas kësaj sulmi u shty për 6 muaj”, ka shkruar Millanoviç.
Dhe duhej të ndodhte tashmë edhe arrestimi i Haradinajt që në opinionin kosovar të shtohej akoma dhe më tepër bindja se Franca gjithnjë ia ka me hile Kosovës. /tesheshi.com/
