Nga Blendi Gashi
Nën brohorimat ‘me Rektorin’ dhe ‘politika jashtë’, para Ministrisë së Arsimit është mbajtur një protestë 10 minutëshe e shoqërisë civile në përkrahje të rektorit të shkarkuar Ramadan Zejnullahu.
Një kërkesë e tyre u realizua pa filluar protesta, ministri Arsim Bajrami shfuqizoi vendimin për shkarkimin e rektorit. 
Rron Gjinovci, i cili moderoi protestën tha se nëse kërkesa e tjera të tyre, që janë: shkarkimi i Këshillit Drejtues dhe emërimi i një organi të përkohshëm, ku gjysma janë ekspertë ndërkombëtarë (pjesërisht e realizuar), shkarkimi i dekanëve dhe emërimi i ushtruesve të detyrës, ndryshimi i ligjit për arsimin e lartë që të pamundësohet ndikimi partiak në universitete publike dhe mbajtja e zgjedhjeve të lira dhe të pandikuara politikisht deri në maj 2016, nuk realizohen deri të mërkurën e javës së ardhshme ata do të mblidhen prapë për të protestuar.
Gjatë 10 minutave të këtij tubimi, protestuesit kanë votuar në mënyrë simbolike me ngritjen e dorës kundër shkarkimit, pa asnjë abstenim apo kundërshtim.
Këshilli Drejtues i UP-së dhe dekani Dugolli reagojnë ndaj vendimit të MASHT-it
Aspak nuk i ka pëlqyer KD të UP-së vendimi i MASHT-it për shfuqizimin e vendimit të tyre të marr dje. Me anë të një deklaratë për opinion, KD i UP-së, ka sqaruar arsyet e shkarkimit të rektorit dhe janë shprehur të shqetësuar për ndërhyrjen në punën e këshillit.
“Shkarkimi i rektorit Zejnullahu është rrjedhojë e situatës së krijuar me keqmenaxhim e UP-s, bllokimin e Senatit, shkeljet e Statutit, shkeljen e Rregullore së punës së Senatit, dëmtimin e buxhetit me vendim gjyqësore, përdorimin e fjalorit dhe gjuhës së urrejtjes ndaj stafit akademik, administrativ dhe të universitetit. Kërkesa për shkarkim është inicuar me kërkesë të 2/3 të senatorëve, është bërë në përputhje të plotë me nenin 31 Pikën 2 të Statutit të UP-s dhe Rregulloren e punës së KD-s. Kulminacioni u arrit në seancën dëgjimore të KD me Senatin senatorët argumentuan qëndrimet dhe nuk kishte asnjë përkrahës senator për rektorin dhe menaxhimin e tij. Me Statutin e UP-s janë vetëm Senati dhe KD-s që me votim të fshehtë e emërojnë dhe shkarkojnë rektorin, prandaj deri në këtë pikë vendimi i KD-s ka respektuar dispozitat statutare”.
Këshilli Drejtues më tej ka dënuar ndërhyrjet direkte nga ministri i arsimit, ku sipas të cilëve është shkelur statuti I UP-së.
“Kërkojmë nga MASHT që të mos ndërhyj në punët e UP dhe sipas Statutit të emërohet ushtruesi i detyrës së rektorit i cili do e përgatit UP për zgjedhjet e përgjithshme që janë në prag,” thuhet në deklaratë e KD të UP-së.
Dugolli: Vendimi i ministrit Bajrami, i kundërligjshëm
Bujar Dugolli, dekan në Fakultetin Filozofik dhe senator në UP, ka reaguar pas vendimit të MASHT-it për shfuqizimin e vendimit të djeshëm të Këshillit Drejtues për shkarkimin e rektorit. Dugolli në një prononcim për gazetën Fjala, e ka quajtur vendimin e ministrit Arsim Bajrami si të jashtëligjshëm.
“Vendimi është i kundërligjshëm pasi që prekë autonominë e UP-së”, ka thënë ai, duke shtuar se kjo është ndërhyrje në punën e universitetit.
Nga ana tjetër, Jusuf Thaçi, njohësi i çështjeve të arsimit, ka përshëndetur vendimin e ministrit Arsim Bajrami për shfuqizimin e vendimit të Këshillit Drejtues të UP-së për shkarkimin e rektorit Ramadan Zejnullahu.
Ai ka thënë se vendimi i ministrit për shfuqizimin e vendimit të Këshillit Drejtues të UP-së për shkarkimin e rektorit është për t’u përshëndetur.
“Por kjo nuk mjafton! Rektori do ta ketë po të njëjtën gjendje e situatë në universitet, i bllokuar e i sabotuar nga të gjitha strukturat tjera të universitetit,” ka theksuar Thaci.
Prandaj duhet të shfrytëzohen të gjitha mundësitë ligjore për ndryshimin e strukturave tjera të UP-së, përfshirë Këshillin Drejtues, Senatin, Dekanët, Këshillat e Fakulteteve dhe Parlamentin Studentor, në mënyrë që rektori të mund të punojë në funksion të stabilizimit dhe përmirësimit të gjendjes në UP, ka shkruar Thaci në FB.
Ndryshe, Ramadan Zejnullahu ka deklaruar se nuk e di nëse do të kthehet në postin e rektorit. “Ende jam duke e shqyrtuar vendimin…”, ka thënë ai.
/tesheshi.com/
