“Mail” këtë të dielë ka marrë anën në favor të qëndrimit të Britanisë në Bashkimin Europian, në fushatën e ethshme që ka hyrë në ditët e fundit për referendumin që do të përcaktojë të ardhmen e shtetit ishullor në bllokun europian. Sipas një editoriali të gazetës, paralajmërohet se “nuk është koha për të rrezikuar paqen dhe prosperitetin”.
Editoriali dyfaqësh paraqet pikëpamjen e gazetës se “sipas të gjitha llogaritjeve’, Britania do të jetë e rrezikuar të paguajë tarifa më të larta, të ketë trazira në tregun financiar dhe një periudhë joqëndrueshmërie nëse do të votohet për t’u larguar nga BE më 23 qershor.
Editoriali akuzon fushatuesit e Brexit se po nxisin “një iluzion të rrezikshëm”. 
“Njeriu e di tashmë, që sidomos në botën ku banojmë aktualisht, dëshirat tona më të thella duhet në në një farë mënyre të moderohen për t’iu përshtatur realitetit të ashpër të një bote konkurruese, në të cilën, edhe pse ende një komb i madh, ne nuk kemi më pushtetin apo pasurinë me të cilat dikur na lejohej të jetonim në një izolim të shkëlqyer”, thuhet në editorial.
Artikulli sulmon “liderët kokëfortë” të fushatës Brexit. “Kaq të etur janë për një divorc sa duket se janë të përgatitur të sakrifikojnë një pjesë të madhe të të ardhurave tona, të degradojnë kushtet tona të jetesës në mënyrë që të fluturojnë drejt një të ardhmeje rozë të “lirisë”. Edhe pse është interesante që ata kanë qenë të kujdesshëm të mos e bëjnë një deklaratë të tillë”.
Gazeta thotë se votuesit nuk duhet të kthejnë shpinat ndaj projektit europian në artikullin që mban titullin “Për një Britani ndërkombëtare, liberale dhe të hapur, kemi nevojë të jemi pjesë e BE”.
Duke konfirmuar se gazeta ka qenë gjithnjë “krenare për pikëpamjen e saj internacionaliste dhe liberale”, artikulli vë në dukje se “pavarësisht shumë defekteve, kjo gazetë beson se BE, pa pikë dyshimi, ka qenë një forcë për mirë.
“Qëndrimi në BE nuk do të eleminojë si me magji sfidat me të cilat Britania përballet në vitet që vijnë. Por, nëse vendosim ta bëjmë këtë, kjo do ta mbajë Britaninë në zemër të reformimit të projektit europian kështu që kombet e Europës do të jenë së bashku më të pajisura për t’u përballur me to”.
“The Sunday Times” doli në mbështetje të votës pro largimit nga BR- një ditë pasi simotra e saj e përjavshme mbështeti kauzën e qëndrimit. Në një editorial, gazeta apeloi për një lidhje “më të lirë e më fleksibël me BE”. Gazeta tha se në një kohë që një diplomacy më e mirë mund ta kishte bërë referendumin të panevojshëm, tashmë që pyetja i shtrohet elektoratit, votimi për t’u larguar ishte rruga më e mirë për të ndalur një bashkim më të shtrënguar politik dhe ekonomik.
Duke kritikuar rimëkëmbjen ekonomike të BE-së që prej recesionit, dhe ndikimin që pati në sovranitetin dhe sigurinë britanike, gazeta thotë: “Në rast të një Brexit, Brukseli mund të ndjekë një strategji të sigurisë globale, ndoshta duke përfshirë edhe një ushtri të BE-së pa veton britanike”.
“Duhet të mbetemi jashtë. Është NATO që garanton sigurinë tonë”.
“The Sunday Telegraph” u shfaq në favor të Brexit me një editorial: “Për ballancë… ne besojmë se fushata e largimit të Britanisë ka artikuluar një vision ambicioz për Britaninë si një komb i pavarur, përsëri i lirë të marrë vetë vendimet. Qëndrimi në të kundërt, ka sjellë një pesimizëm të zymtë”.
Gazeta akuzoi kancelarin George Osborne se bëri “kërcënime të padëgjuara” për pensionet dhe “parashikime të ekzagjeruara” për marrëveshjet tregtare, që , së bashku me çështje të tjera, sjellin një valë pesimizmi.
Duke deklaruar se BE “i takon së kaluarës”, gazeta thotë: “Largimi nga BE nuk do të thotë largim nga Europa. Një votë për Brexit të enjten nuk do të ndryshojë gjeografinë tonë”.
Përgatiti: Juli Prifti – /tesheshi.com/
