Ka nisur e qetë seanca e sotme parlamentare në Kuvendin e Shqipërisë, ku pritet votimi i dy dekreteve të Presidentit Bujar Nishani, për emërimin e dy anëtarëve të rinj të Gjykatës së Lartë, konkretisht Markelian Koça dhe Fuat Vjerdha.
Deputetët kanë marrë fjalën e tyre ku kanë diskutuar për çështje e rendit të ditës, deri në momentin e ardhjes në ambientet e Kuvendit të ish kryeministrit Sali Berisha, i cili nuk i ka kursyer as kësaj here akuzat për kryeministrin aktual Edi Rama, i cili nuk ka mbërritur ende në këtë seancë.
Duke thënë se qeveria është e mbushur me skandale, ai anonçoi skandalin e radhës, i cili prek në mënyrë të drejtpërdrejtë z. Rama.
Berisha tha se mediat belge informojnë që studio e zgjedhur nga Edi Rama ka shkelur të gjitha rregullat dhe ligjet e vendit me përzgjedhjen e kompanive në funksion të qeverisë shqiptare, duke shpallur fituese studion që do shndërronte sheshin “Skënderbej” në piramidë, dhe që do ndërtojë “Lungomaren” në Vlorë, ndërsa bëri me dije se studio e Ramës do të ndiqet penalisht.
“Studio që përfaqëson Edi Ramën do të ndiqet penalisht dhe për rrjedhojë do ketë dëshmitar kreun e qeverisë shqiptare”, tha Berisha.
Ish kryedemokrati nuk la pa përmendur as deputetin Koço Kokëdhima.
“Në vend që të bëhej mbledhje për ti hequr mandatin Koço Kokëdhimës për grabitjen në dhunim flagrant të Kushtetutës të përvetësimit të pasurisë publike, Kokëdhima tallet. Pasi i bëri gjëmën Qeparoit me ndërtimet e tij, pasi me tenderat e Edi Ramës vodhi dhe ndau paratë, ku u binin tavanet nxënësve të shkollave të ndërtuara prej tij, tani ka marrë ndihmën e sivëllaut të tij Edi Rama me nënë Feridenë. Kjo është klima që ekziston në këtë Parlament”,- ta ndër të tjera z. Berisha./tesheshi.com/
