Nga Bashkim Kastrati
Një ditë para ndeshjes ndërmjet përfaqësueses së Kosovës dhe kombëtares shqiptare atmosfera në Prishtinë ka filluar të nxehet.
Në rrugët e Prishtinës janë ngritur disa pika ku janë duke u shitur simbole kombëtare, fanella të lojtarëve të kombëtares së shqiptare, por edhe simbole dhe fanella të përfaqësueses së Kosovës.
Edhe pse ende nuk kanë dalë biletat në shitje, interesimi i qytetarëve për ta ndjekur këtë ndeshje është i madh. Dje është pritur që të dalin në shitje biletat për ndeshjen. Ekipi i tesheshi.com ka qenë në kafenenë e klubit të futbollit Prishtina dhe në disa pika tjera ku do të shiten biletat, por aty na u tha që biletat do të dalin në shitje sot.
“Biletat duhet të dilnin sot në shitje dhe kanë pas për t’i sjellë një pjesë edhe në lokal, por sot nuk i sollën dhe pritet që nesër të dalin në shitje dhe një pjesë e qytetarëve që dëshirojnë ta shikojnë ndeshjen mund t’i blejnë biletat në këtë kafene. Sot gjatë ditës ka pasur një numër të madh të atyre që kanë ardhur për bileta”, u shpreh dje njëri nga punëtorët e kësaj kafeneje.
Për tribunat prapa portave, bileta do të kushtojë 3 euro, për tribunën në lindje bileta do të ketë çmim 7 euro, ndërsa bileta për tribunën perëndimore të stadiumit të qytetit në Prishtinë bileta kushton 10 euro.
Sot kanë dalë në shitje biletat në disa pika në qendër të Prishtinës. Në të gjitha këto pika kishte shumë njerëz të interesuar për të blerë bileta. Ata ankoheshin për organizim të dobët dhe pritje të gjata, sidomos tek pika e shitjes që është tek “New Born”.
“Shumë organizim i dobët jam që një orë duke pritur dhe nuk jam as afër që ta blejë. Të tjerët po i blejnë pa pritur shumë në radhë, nuk është korrekte kjo që dikush të hyjë pa radhë. Është dashtë që të ketë më shumë pika të shitjes, që të mos presim me orë të tëra këtu”, u shpreh Artan Salihu.
Që nga dje pasdite grupi i tifozëve nga Prishtina “Plisat” kanë filluar që ta veshin Prishtinën me flamurin kuq e zi. Ky tifo-grup ka vendosur 5000 flamuj kombëtar nëpër rrugët e Prishtinës. Ky tifo-grup është shprehur hapur kundër përfaqësueses së Kosovës, duke u deklaruar vetëm për një kombëtare atë të Shqipërisë.
Kuq e Zi vs Kaltër e Bardh
Qytetarët kanë mendime të ndryshme sa i përket rezultatit të ndeshjes dhe përkrahjes. Një pjesë e konsiderueshme bartin fanellat, dhe simbolet kuq e zi, ndërsa disa edhe simbole të Kosovës, e ka edhe nga ata që të i kanë kombinuar simbolet e dy shteteve.
Shumica prej tyre thonë se kjo është një ndeshje festive miqësore dhe nuk është shumë më rëndësi rezultati përfundimtar, por se të ketë lojë korrekte dhe tifozë të shumtë në stadium. Ka nga ata që thonë se duhet të kemi vetëm një kombëtare shqiptare, ndërsa ka mendime se duhet që edhe Kosova të ketë ekipin e vetë.
“Kjo është një ndeshje miqësore, por edhe festive ku do të festohet kualifikimi historik i Shqipërisë në Kampionatin Evropian në Francë. Pra atje do të ketë shqiptarë që do të na përfaqësojnë dhe kjo është një gjë shumë më rëndësi. Kombëtarja aktualisht përfaqëson gjithë trevat shqiptare, sepse ka lojtarë nga të gjitha këto treva dhe nga të gjitha religjionet. Pra vetëm kur u bashkuam u arrit suksesi dhe mendoj se shqiptarët duhet ta kenë vetëm një kombëtare të fortë, e jo dy e të dobëta”, thotë Qëndrim Aliu.
Por ka nga ata që mendojnë se Kosova duhet që ta ketë përfaqësuesen e vetë dhe se së pari duhet që të rregullohen çështjet politike e pastaj të bëhet një kombëtare.
“Unë jam që edhe Kosova duhet ta ketë ekipin e vetë dhe të garojë në gara ndërkombëtare, sepse ky është realitet, ne kemi dy qeveri, dy parlamente dhe derisa të jetë kështu edhe kombëtarët do të jenë dy. Nëse bashkohen këto institucione, edhe kombëtarët bashkohen. Në këtë realitet djemtë tanë duhet që të kenë mundësi që të luajnë futboll dhe të zhvillohen në arenën ndërkombëtare dhe kjo nuk e dëmton aspak Shqipërinë, sepse kemi talente mjaftueshëm si në Kosovë e ashtu edhe në diasporë”, thotë Kreshnik Rexhepi.
Ndërsa një pjesë e kanë një problem tjetër tek aspekti politik. Ata e përkrahin përfaqësuesen e Kosovës, por thonë se ajo mund të politizohet dhe të përfshihen lojtarë nga komunitete tjera pa e merituar, por vetëm se të jetë multietnike.
“Kombëtaren Kuq e Zi e kam në zemër dhe jam gëzuar shumë për kualifikim. Por me realitetin që jemi tash edhe Kosova duhet që të ketë ekipin e saj dhe të pranohet në UEFA e FIFA. Dy federatat duhet të bashkëpunojnë më mirë dhe të krijohet një ligë. Pra edhe nëse ekzistojnë dy ekipe mund ta ndihmojnë njëra-tjetrën. Por kam dyshime se edhe këtu do të ndërhyjnë për ta bërë multietnike. Kjo i bie që të luajnë lojtar vetëm pse nuk janë shqiptarë dhe që nuk e meritojnë të luajnë me aftësitë që kanë. Nëse ndodh kjo unë nuk do ta përkrahi kurrë”, theksoi Besim Hasani.
Ndeshja ndërmjet Kosovës dhe Shqipërisë do të luhet në stadiumin e Prishtinës në ora 14:00.
/tesheshi.com/
