Princi jordanez, Ali bin Al Husein ka njoftuar se përsëri do të jetë kandidat për postin e presidentit të Asociacionit Botëror të Futbollit (FIFA) pasi që mbrëmë tërheqjen nga ky post e paralajmëroi Joseph Sepp Blatter, raporton AA.
Këtë informacion për AA e ka konfirmuar asistenti i princit Husein Salah al-Sabra.
Sabra shtoi se princi Husein mund të bëhet president i FIFA-s edhe pa mbajtjen e zgjedhjeve të reja, në qoftë se nuk do të ketë mosmarrëveshje ligjore dhe këtë ide e mbështesin disa federata të futbollit nga Evropa.
Princi Husein dje kishte një prononcim para gazetarëve dhe i bëri thirrje shefit të FIFA-s Blatter të japë dorëheqje sepse organizatën e ka udhëhequr si kompani, dhe jo si një institucion i cili është në shërbim të publikut të futbollit.
Blatter më vonë njoftoi se do të japë dorëheqje dhe do të thërrasë një kongres të jashtëzakonshëm të FIFA-s ku do të zgjidhet pasardhësi i tij. Ai ndodhej në krye të FIFA-s që nga viti 1998, ndërsa mandatin e ri e fitoi në zgjedhjet e mbajtura në kongresin e 65-të të organizatës, të mbajtur të premten në Cyrih. Kundërshtari i tij në këto zgjedhje, ishte pikërisht Princi Husein. Blater fitoi 133, ndërsa Princi Husein 73 vota. /tesheshi.com/
