Princesha Haya Bint al-Hussein, gruaja e sundimtarit të Dubait, Sheikh Mohammed Al Maktoum, është duke u fshehur në Londër, nga ku edhe ka deklaruar se “ka frikë për jetë pasi ia mbathi nga burri i saj.
Sheikh Mohammed, 69 vjeç, i cili është posedues i pasurive miliardëshe, ka akuzuar gruan e tij në Instagram për siç tha ai “pabesi”. Princesha Haya vjen nga një familje mbretërore dhe është gjysmëmotra e mbretit Abdullah të Jordanisë.
E lindur në Jordani dhe e arsimuar në Britani, 45 vjeçja u martua me Sheikh Mohammed në vitin 2004, duke u bërë gruaja e tij e gjashtë dhe është quajtur ndryshe si “nusja e vogël”.
Sheiku Mohammed ka 23 fëmijë nga gra të ndryshme. Princesha Haya iku fillimisht këtë vit në Gjermani për të kërkuar azil. Tani thuhet se jeton në një shtëpi në lagjen Kensington në Londër, dhe po përgatitet për një betejë ligjore në Gjykatën e Lartë.
Por, çfarë e nxiti atë të ikte nga jeta luksoze në Dubai dhe përse thotë se “është e frikësuar për jetën e saj”?
Burime pranë saj kanë thënë se Princesha Haya kishte zbuluar fakte shqetësuese pas kthimit misterioz në Dubai vitin e kaluar të Sheikha Latifa, një nga vajzat e sundimtarit.
Ajo u largua nga Emiratet e Bashkuara Arabe me ndihmën e një francezi, por u kap nga burra të armatosur jashtë brigjeve të Indisë dhe u kthye në Dubai.
Princesha Haya, e cila është arsimuar në Universitetin e Oksfordit, thuhet se dëshiron të qëndrojë në Britani të Madhe.
Nëse burri i saj kërkon ekstradimin, atëherë kjo paraqet një “kokëdhimbje” diplomatike për Britaninë, e cila ka lidhje të ngushta me Emiratet e Bashkuara Arabe.
Rasti është gjithashtu i vështirë për Jordaninë, pasi Princesha Haya është gjysmë motra e mbretit Abdullah të Jordanit. Pothuajse një e katërta e një milion jordanezëve punojnë në Emiratet e Bashkuara Arabe, duke dërguar remitenca, dhe Jordania nuk mund të përballojë këso lloj “çarjesh” me Dubain. /tesheshi.com/
