Pretendime të reja rrëqethëse nga Mariupoli: Ç’tha Zelensky në fjalimin e mbrëmshëm?

Presidenti ukrainas Volodymyr Zelensky tha të hënën se Rusia mund të përdorë armë kimike në Ukrainë dhe i bëri thirrje Perëndimit të vendosë sanksione të forta në mënyrë që Moska të mos guxojë të flasë për përdorimin e armëve të tilla.

Dje, gjatë ditës, u publikuan raporte të paverifikuara që sugjeronin se Rusia përdorte armë kimike në Mariupol, një qytet-port në jug të vendit.

“Ne e marrim këtë shumë seriozisht,” tha Zelensky në një fjalim video të natës të hënën.

Presidenti ukrainas, megjithatë, nuk tha se armë të tilla ishin përdorur tashmë.

“Unë do të doja t’u kujtoja liderëve botërorë se përdorimi i mundshëm i armëve kimike nga ushtria ruse tashmë është diskutuar. Kjo do të thotë se ishte e nevojshme të reagonim më ashpër dhe më shpejt ndaj agresionit rus,” shtoi ai.

Ndihmës kryetari i bashkisë së Mariupolit, Petro Andryuschenko, shkroi në raportet e tij përmes Telegramit se sulmet kimike nuk janë konfirmuar dhe se ai pret të jetë në gjendje të publikojë detaje dhe shpjegime më vonë.

Zëdhënësi i Pentagonit, Peter Kirby, tha se Shtetet e Bashkuara ishin të njohura me raportet.

“Nuk mund të konfirmojmë asgjë për momentin, por do të vazhdojmë ta monitorojmë situatën më nga afër”, tha ai.

“Këto raporte, nëse janë të vërteta, janë thellësisht shqetësuese dhe tregojnë frikën që ne kemi shprehur për mundësinë e përdorimit nga Rusia”, tha ai.

Pushtimi rus është zhvendosur nga periferitë e Kievit në Ukrainën lindore ku pritet një sulm i madh. Bashkimi Evropian tha të hënën se sanksione shtesë kundër Rusisë ishin të mundshme.

“Është koha për të përgatitur një paketë të tillë në mënyrë që të mos dëgjojmë asnjë fjalë nga Rusia për armët e shkatërrimit në masë”, tha Zelensky.

Ai shtoi se embargoja e importit të naftës nga Rusia është një domosdoshmëri dhe se çdo paketë masash që nuk ka të bëjë me naftën do të pritet me buzëqeshje në Moskë. /tesheshi.com/