Riaktivizimet më të fundit të shtetit dhe medias greke për rastin “Balili”, kanë çuar në këmbë policinë shqiptare, e cila këtë fundjavë ka nisur një operacion të gjërë në jug, kryesisht në Sarandë, Delvinë e Gjirokastër, në kërkim të Klement Balilit, që nga fqinji ynë jugor konsiderohet si “baron droge”.
Akuzat për ish-kreun e Shërbimit të Transportit Rrugor në Sarandë nisën prillin e kaluar, ku mediat e Athinës shkruan për Balilin.
Ky i fundit reagoi duke thënë se ishte i pastër e se akuzat ishin një lojë politike, të nxitura nga Berisha. Por më pas ai kaloi në ilegalitet dhe prej asaj kohe nuk është shfqaur më në publik, veç rastit të një interviste dhënë për një media greke afro dy muaj më parë.
Gjatë muajve të mungesës së tij, PD e Berisha kanë akuzuar mazhorancën e Ramën personalisht, se po e mbajnë të fshehur Balilin. Por ndërkohë, ndaj tij nuk ka patur një urdhërarrest nga prokuroria shqiptare, veç atij të autoriteteve greke.
Operacioni i nisur nga policia përfshin dhe një kontroll në pronat e tij në pellgun Sarandë – Delvinë, ku, edhe pse zyrtarisht nuk figurojnë të tijat, më të mëdhatë që përfshihen tek “lista Balili” e pasurive janë restorant “Livia” në krah të hyrjes së Parkut të Butrintit; klubi i natës “Factory”, si dhe gjigandi “Santa Quaranta”, një ndër resortet më të mëdha dhe më luksoze në bregdetin shqiptar.
Balilajt vijnë nga shtresa e të përndjekurve politikë. Kanë qenë të angazhuar në strukturat e PD-së në vite, por që më pas kaluan me LSI-në. /tesheshi.com/
