E pari nga dy reaktorët në termocentralin bërthamor në Fessenheim, në Francën lindore, më i vjetri akoma në veprim në Francë, u mbyll të shtunën në orën 2:00 të mëngjesit, tha kompania e energjisë elektrike EDF.
Kjo është faza e parë në mbylljen e uzinës në kufirin gjerman, jo shumë larg nga Zvicra, e cila u ndërtua në vitin 1977. Ndërprerja e reaktorit të dytë është caktuar për në 30 qershor.
Punëtorët që ishin kundër mbylljes së reaktorit të parë thanë më herët se ata do të refuzojnë bindjen dhe nuk do të zbatojnë protokollin e fikjes për reaktorin.
Sidoqoftë, në fund gjithçka shkoi pa probleme dhe procedura u krye si me mirëmbajtje të rregullt, vetëm kësaj radhe reaktori nuk do të rindizet.
Reaktori i dytë do të mbyllet në 30 qershor, me planet për shkarkimin e karburantit të harxhuar, i cili do të përfundojë deri në verën e vitit 2023. Ndërprerja përfundimtare e uzinës do të ndodhë në rastin më të mirë vetëm në 2040, pasi Franca nuk ka bërë më herët asgjë të ngjashme.
Ky termocentral bërthamor në Francë, por edhe në Gjermani dhe Zvicër, ishte një simbol i të gjitha rreziqeve dhe shkaku i shumë grevave dhe protestave.
Deri në vitin 2035, Franca planifikon të mbyllë njëmbëdhjetë tjerë nga 58 reaktorët që ka sot, duke e bërë atë parkun e dytë më të madh bërthamor në botë pas SHBA-së, por nuk do të mbyllë impiantet plotësisht si ky në Fessenheim.
Franca dëshiron të zvogëlojë gradualisht pjesën e saj të energjisë bërthamore, e cila aktualisht është 70 përqind, më e madhja në botë dhe të rrisë pjesën e saj të energjisë elektrike nga burimet e rinovueshme. /tesheshi.com/
