Islam Karimov, presidenti i Uzbekistanit, ka shfrytëzuar ceremoninë e kremtimit të 24-vjetorit të pavarësisë së vendit për të përsëritur vendimin e palëkundur për të mos lejuar trupa të huaja në ish-republikën sovjetike.
Duke folur në ceremoninë solemne, Karimov tha mes të tjerash, “Unë besoj se është e nevojshme ta theksoj edhe një herë: Uzbekistani nuk ka për t’iu bashkuar asnjë blloku politik dhe ushtarak, nuk ka për të lejuar absolutisht dislokimin e bazave të huaja ushtarake në territorin e tij, si dhe nuk do të lejojë praninë e ushtarakëve tanë jashtë.”
“Populli ynë ka nevojë vetëm për paqe dhe qetësi. Kjo është dëshira e popullit uzbek. Ky është objektivi i popullit uzbek. Ky është vendimi i popullit uzbek. Koha që po jetojmë kërkon të jemi vigjilentë, të luftojmë për jetën tonë të paqtë dhe të qetë, e ta ruajmë qiellin tonë të pastër,” shtoi udhëheqësi uzbekistanas.
Deklarata e Islam Karimovit vjen pesë ditë pasi SHBA-të njoftuan se i kishin kërkuar Tashkentit t’i bashkohej koalicionit shumëkombësh kundër ISIS-it.
Presidenti uzbekistanas është shprehur në mënyrë të përsëritur mbi nevojën për të ruajtur statusin e një vendi të paangazhuar, duke mos lejuar vendosjen e bazave të huaja në vend dhe dislokimin jashtë kufijve të trupave uzbeke. /tesheshi.com/
