Një prej pesë kushteve të BE-së për heqjen e vizave për qytetarët turq është ai i ndryshimit të ligjit të antiterrorit. Një kusht i pritur aspak mirë nga Rexhep Tajjip Erdogan, presidenti i Turqisë.
Ai ka shfrytëzuar sot një aktivitet në një prej lagjeve të Stambollit për t’i dhënë përgjigje kësaj kërkese, duke e hedhur poshtë atë pa mëdyshje.
“BE-ja thotë që për vizat duhet të ndryshoni ligjin e luftës kundër terrorit,” ka thënë Erdogani.
Për ta ashpërsuar gjuhën më pas, “Pse nuk e ndryshoni ju më parë mendësinë e ngritjes së çadrave para Parlamentit Europian?”
Presidenti i referohet ngritjes së tendave në Bruksel nga mbështetësit e PKK-së në mars të këtij viti, pikërisht atëherë kur Turqia po tronditej nga aktet terroriste.
Erdogani e ka bërë të qartë se nuk do ta pranojë një kërkesë të tillë: “Ne po shkojmë në rrugën tonë, ju shkoni në rrugën tuaj! Merruni vesh me kë mund të merreni!”
Fjalët e Erdoganit vijnë dy ditë pasi Komisioni Europian propozoi heqjen e vizave për shtetasit turq. /tesheshi.com/
