Presidenti i vendit, Hashim Thaçi në forumin “Fol Hapur’, të organizuar nga Lëizja FOL tha se gjatë mandatit të tij presidencial do të angazhohet fuqishëm për promovimin e dialogut në Kosovë.
Ai tha se do të promovojë dialogun mes liderëve politikë në pushtet dhe atyre opozitarë.
Presidenti i vendit, tha se dialogu nuk ka alternativë dhe është rruga e vetme për zgjidhjen e problemeve.
Ai tha se agjenda evropiane bashkon politikën kosovare, ndërsa tha se do të punojë të kultivojë edhe dialogun e mëtejmë mes institucioneve të vendit dhe komuniteteve.
“Kosova do të jetë shembull i tolerancës dhe bashkëjetesës… Kemi Kushtetutën më të mirë në botë”, tha Thaçi.
Thaçi foli edhe për dështimin për të bërë ushtrinë e Kosovës, për çka sa ishte kryeministër premtoi një gjë të tillë por që nuk arriti ta realizoj premtimin e dhënë.
Thaçi tha se në vitin 2014 politika kosovare e humbi hapin për themelimin e Forcave të Armatosura të Kosovës, për shkak të neglizhencës së vendorëve.
Ai tregoi se propozimin e kishte dërguar në Kuvend, por politika kosovare ishte para procesit elektoral dhe neglizhencën e asaj kohe po e paguajnë sot.
“Kam besim se Forcat e Armatosura do të themelohen në një të ardhme të afërt”, tha presidenti.
Ndërkaq, i pyetur se a do të rikthehet në PDK pasi të përfundoj mandatin si president, Thaçi tha se nuk do të jetë më pjesë e partisë që e udhëheqi për 16 vite. /tesheshi.com/
