Presidenti i Republikës, Bujar Nishani ka uruar ditën e sotme gjithë besimtarët myslimanë fillimin e Muajit të Shenjtë të Ramazanit.
“Të dashur besimtarë myslimanë shqiptarë, e nesërmja shënon për të gjithë ju një ditë sa të veçantë shpirtërisht, aq edhe të vështirë fizikisht.Me këtë rast dëshiroj t’ju uroj përzemërsisht dhe me sinqeritet të thellë fillimin e mbarë të kësaj feste kurorëzuese të besimit tuaj të palëkundur”, – uroi Presidenti
Ai shtoi se muaj i shenjtë dhe i pakrahasueshëm shënon sakrificën më sublime njerëzore ndaj besimit të palëkundur për Krijuesin, për ligjet e patjetërsueshme dhe rregullat hyjnore, të cilat kthjellojnë shpirtrat e përkushtuar dhe pastrojnë e qetësojnë mendjet e trazuara të besimtarëve myslimanë në mbarë botën, duke i bërë edhe më të vetëdijshëm për mrekullinë e besimit dhe rëndësinë e vlerave të tij.
“Le të shërbejë ky Muaj i shenjtë për të gjithë Ju besimtarë myslimanë, që të lini mënjanë ndasitë, t’i bëni thirrje ndërgjegjes suaj për të përmbushur më së mirë detyrimet dhe përgjegjësitë njerëzore dhe fetare, për t’iu shmangur veseve dhe dobësive, për t’iu gjendur me më shumë dashuri dhe përkujdesje njëri-tjetrit dhe të afërmve tuaj si dhe për të vënë në piedestal e për t’iu falur vetëm vlerave të vërteta e të pastra njerëzore”, – ishin fjalët e kreut të shtetit.
Në përfundim ai uroi një agjërim sa më të lehtë gjatë Muajit të Ramazanit dhe njëkohësisht mendje sa më të kthjellëta e shpirtra sa më të kulluar./tesheshi.com/
