Presidenti i Greqisë, Prokopis Pavlopoulos ka folur sërish kundër Shqipërisë, edhe pas deklaratës së kreut të Shtetit shqiptar Ilir Meta.
“Shqipëria po bën një gabim duke rrezikuar të ardhmen në BE. Shqipëria nuk duhet të mbështes bashkëpunëtorët të nazistëve”, tha Pavlopulos.
Gjatë një takimi me homologun gjeorgjian, Presidenti i Greqisë ka folur përpara gazetarëve duke thënë se Shqipëria duhet të respektojë të drejtat e pakicave në respektim të parimeve ndërkombëtare.
Ai shtoi se të gjithë ata që mbështesin çështjen çame nuk favorizojnë miqësinë mes dy shteteve.
“Udhëheqësit nuk duhet të mbështesin bashkëpunëtorët e vjetër të nazistëve. Shqipëria është një vend mik. Shqipëria duhet të respektojë të drejtat e pakicave. Respektimi në përputhje me të drejtat europiane.
Shqipëria duhet të respektojë të drejtat pronësore të minoritetit. Ata që mbështesin çështjen Çame nuk favorizojnë miqësinë. Ne e mbështesim perspektivën europiane të Shqipërisë. Dëshira për t’u bërë anëtare e Bashkimit Evropian dhe mbështetja e të drejtave joekzistuese të bashkëpunëtoreve të nazizmit nuk duket të tregojë një perspektivë serioze evropiane”, tha Pavlopulos.
Ditën e sotme, presidenti i Republikës Ilir Meta i dha një përgjigje homologut të tij grek, në lidhje me deklaratat e mëparshme.
Sipas Metës, “qëndrimet e presidentit grek nuk sjellin energji pozitive”.
Kreu i shtetit shqiptar tha se qëndrimet e OPavlopulos janë “jo në sintoni me paktin Bushati- Kotzias. Deklaratat e tij nuk i përgjigjen partneritetit. Të ruajmë qetësinë dhe respektin reciprok”.
Deklaratat e Presidentit grek kanë ardhur pas një klime më të qetë të vendosur mes qeverive, pas negociatave të Kretës dhe Korçës ku u ra dakord për shumë çështje.
Tirana zyrtare vendosi që të nisë kërkimin e eshtrave për ushtarët grekë, ndërkohë që po zhvillohen bisedimet për Marrëveshjen e Detit.
Në prill pritet që Tiranën ta vizitojë kryeministri Alexis Tsipras për të firmosur Paktin e Partneritetit Strategjik. /tesheshi.com/
