François Hollande, në të parën vizitë në Kale (Calais) që prej zgjedhjes së tij president, ka deklaruar se “xhungla”, siç quhet ndryshe kampi i emigrantëve në veri të vendit, duhet çmontuar plotësisht.
Ai e ka përshkruar si “emergjencë humanitare” situatën në kamp. Në të njëjtën kohë, ka kërkuar dhe forcim të kufirit midis Francës dhe Britanisë.
“Ne duhet të garantojmë një mbyllje të qëndrueshme dhe efektive të kufirit francezo-britanik,” është shprehur Hollande.
Shumica e emigrantëve, ku pjesën më të madhe e përbëjnë sudanezët dhe afganistanasit, kërkojnë të shkojnë në Britani.
Hollande i ka bërë thirrje dhe Britanisë që të luajë rolin e saj në zgjidhjen e krizës së emigrantëve.
“Jam i vendosur t’i shoh autoritetet britanike të bëjnë pjesën e tyre në përpjekjen humanitare që po ndërmerr Franca këtu,” ka vijuar të thotë presidenti francez gjatë vizitës së tij.
Numri i emigrantëve në “xhunglën” e Kalesë sillet nga 7.000 në 10.000 në varësi të burimit citues.
Kryetari i shtetit francez bëri të ditur të shtunën se çmontimi i kampit do të niste para dimrit, dhe përgatitjet paralajmërojnë një fillim të shpejtë të punës. /tesheshi.com/
