Gianni Infantino ka folur pas takimit të parë të Këshillit të FIFA-s, duke bërë të njohur një dokument vizioni të institucionit që ai drejton, të quajtur “Fifa 2.0”.
I zgjedhur muaj më parë si presidenti i ri i FIFA-s, Infantino ka mbrojtur idenë për rritjen e skuadrave pjesëmarrëse në Kupën e Botës, si dhe për zhvillimin në më shumë se një vend të aktivitetit, për të shmangur shpenzimet e fryra.
Infantino do të thoshte para gazetarëve se asnjë vendim nuk do të merrej deri në janar për ta bërë Kupën e Botës me 40 apo 48 skuadra që nga viti 2026, duke shtuar se gjithsesi ekzistonte tashmë një ndjenjë pozitive rreth idesë.
“Do të jenë 40 apo 48, ky ishte një diskutim pozitiv. Nuk jam i mendimit se kjo do ta ulë cilësinë. Dua t’u kujtoj se në Botërorin e fundit, Anglia dhe Italia u eliminuan nga Kosta Rika. Niveli i futbollit është rritur në të gjithë botën. Cilësia do të jetë më e lartë në një format me 48 skuadra, sepse 32 ekipet do të kenë një play-off. Cilësia do të përmirësohet, dhe kurrsesi nuk do të dobësohet.”
Një prej premtimeve të përmendura prej tij ishte dhe shtimi i shpërblimeve, për çdo federatë që është anëtare e FIFA-s, në 1.25 milionë dollarë përgjatë katër viteve, nga 400.000 dollarë që është aktualisht.
Presidenti i organit më të lartë të futbollit botëror e çmoi vizionin “Fifa 2.0” si të ndryshëm nga ai i sipërmarrjeve të mëhershme të Sepp Blatter-it. /tesheshi.com/
