Vatikani ka qenë ndalesa tjetër e Donald Trump-it në turneun e tij të parë jashtë SHBA-së si president. Pas Arabisë Saudite, Izraelit dhe territoreve palestineze, Trump ka vizituar sot Selinë e Shenjtë, i pritur nga Papa Françesku.
Dy personalitetet kanë shkëmbyer deklarata jo fort miqësore vitin e shkuar, të mospajtuar mes tyre për një seri çështjesh. Vullneti i Trump-it për të ndërtuar një mur përgjatë kufirit me Meksikën pati nxitur reagimin e kreut të Kishës Katolike.
“Një person që mendon vetëm për ndërtimin e mureve, dhe jo të urave, nuk është kristian,” thoshte Papa Françesku asokohe.
Trump do të përgjigjej duke deklaruar se ishte e turpshme që Papa të vinte në dyshim besimin e tij.
Takimi i sotëm kokë më kokë në Vatikan është paraprirë nga një shtrëngim i ngrohtë duarsh. Pritja është kryer në bibliotekën private të Pallatit Apostolik.
Presidenti amerikan do të gjendet po këtë të mërkurë në Bruksel, për një takim të NATO-s. /tesheshi.com/
