Kryeministri kroat Andrej Plenkoviç, vendi i të cilit udhëheq Presidencën e BE-së, u kërkoi investitorëve në samitin e Bankës Evropiane për Rindërtim dhe Zhvillim në Londër që të investojnë në Ballkanin Perëndimor.
“Kroacia do të bëjë gjithçka që mundet për të ndihmuar fqinjët e saj juglindorë dhe komuniteti i investimeve duhet të shfrytëzojë mundësinë për të përfituar nga këto vende dhe tërë Bashkimin Evropian,” tha Plenkoviç.
Plenkoviç dhe presidenti i BERZH-it, Suma Chakrabarti hapën në Londër samitin e katërt të investimeve në Ballkanin Perëndimor.
Samiti, i cili mbahet rregullisht që nga viti 2014, mblodhi së bashku kryeministrat e gjashtë vendeve në Evropën Juglindore.
“Ne jemi vendi që e njohim më mirë zonën dhe që mbështet ato vende që të shpejtojnë rrugën e tyre drejt Bashkimit Evropian. Kjo është një nga përparësitë tona kryesore,” tha Plenkoviç.
Ai shtoi se Kroacia, si Presidente e radhës e BE-së, kishte arritur tashmë sukses duke përfshirë çështje të zgjerimit në axhendën e Brukselit. Kjo bëri që disa shtete të tjera anëtare të zhvillojnë takime të nivelit të lartë për zgjerimin në Ballkanin Perëndimor përpara samitit të Zagrebit më 6 dhe 7 maj.
Ndaj, kryeministri Edi Rama falënderoi Plenkoviç dhe Kroacinë për atë që po bëjnë për rajonin.
“Kroacia është në një farë mënyre agjenti ynë në Bruksel dhe njëkohësisht shërben si përkthyes i saj për këtë rajon”, tha Rama.
“Si një investitor kryesor në rajon, ne mezi pritëm samitin e katërt të investimeve për Ballkanin Perëndimor, një përparësi për BERZH. Qëllimi ynë është të zhbllokojmë potencialin e rajonit duke mbështetur norma më të larta të rritjes ekonomike dhe integrimin e tij rajonal dhe evropian”, tha Chakrabarti. Ai njoftoi se gjashtë projekte të reja për Ballkanin Perëndimor do të nënshkruhen sot.
Ai shtoi se qëllimi i samitit ishte të nënvizonte potencialin për investime dhe biznes në vendet e Ballkanit Perëndimor.
BERZH është një nga investitorët më të mëdhenj në vendet e Ballkanit Perëndimor, për të cilin ka investuar 13 miliardë euro. /tesheshi.com/
