Tani është për t’u besuar. Leicester City ka dëshmuar edhe njëherë se e ka seriozisht pretendimin për ta fituar titullin kampion në Premier Ligë ndërsa ka dalë fitues ndaj një tjetre skuadër “big”. Sfida e mbrëmshme ndaj Liverpool-it, e vlefshme për javën e njëzet e katërt të kampionatit anglez, ka përfunduar 2-0.
Ishte Jamie Vardy, golashënuesi më i mirë i kampionatit, që e ka zgjidhur ndeshjen me dy supergola, për t’i dhuruar fitoren e katërmbëdhjetë këtë sezon skuadrës së drejtuar nga Claudio Ranieri.
Ndalet Arsenal-i
Topçinjtë mbeten prapa në luftën për titullin kampion, pasi kanë bërë një tjetër hap fals. Arsenal-i nuk
shkoi më tepër se një barazim pa gola në shtëpi ndaj Southampton-it, duke rrëshqitur në vend të katërt në renditje, me pesë pikë prapa Leicester City-t.
Skuadrat nga Mançesteri regjistrojnë fitore
Manchester City ka fituar 0-1 në transfertë ndaj Sunderland-it, me golin e vetëm të shënuar nga Kun Aguero, kurse Manchester United ka mposhtur me një rezultat bindës, 3-0, Stoke City-n. /tesheshi.com/
