Drama ndërmjet londinezëve të Chelsea-t dhe Everton-it ka përfunduar në barazim, 3-3. Në fakt, skuadra nga qyteti i Liverpool-it bëri paraqitje më të mirë, me ç’rast pati epërsinë e dy golave. Mirëpo golat e Diego Costa-s dhe Cesc Fabregas-it ishin të domosdoshëm për këndelljen e bluve. Ishte mbrojtësi argjentinas, Funes Mori, që ndezi sërish sfidën, duke e kaluar Everton-in në epërsi, ndërsa në fund fare u përgjigj homologu i tij nga reparti i mbrojtjes, John Terry, duke e barazuar rezultatin në minutën e 98-të, nga një pozicion i dyshimtë jashtë loje.
Manchester City thjesht bëri detyrën përballë Crystal Palace-it, duke fituar 4-0. Mesfushori i ardhur këtë sezon, Fabian Delph, hapi serinë e golave për “qytetarët” në “Etihad”. Sergio Aguero me një dygolësh vazhdoi goleadën, teksa atë e mbylli mesfushori spanjoll David Silva.
Sunderland-i i befasoi vendasit e Tottenham Hotspur-it në fundin e pjesës së parë përmes Patrick van Aanohlt-it, kurse përgjigjja erdhi shpejt me mesfushorin Christian Eriksen, që barazoi rezultatin. Në fraksionin e dytë të lojës “Spurs”-at ishin më kërkues, me ç’rast realizuan edhe tre gola të tjerë, që do u siguronin trepikëshin e radhës. Eriksen me një tjetër gol, dhe Dembele e Kane që shënuan po ashtu, përmbysën gjithçka në “White Hart Lane”, për t’i fiksuar shifrat në 4-1 në favor të Tottenham-it.
Kampionati vazhdon të udhëhiqet nga Leicester City, me 44 pikë, i ndjekur nga Manchester City dhe Arsenal-i me nga 43 pikë. /tesheshi.com/
