E ashpër ka qenë përballja në “Etihad Stadium” mes Mançester Sitit dhe Çelsit. E çuditshme po ashtu kanë qenë ajo.
Dhe të tilla çudi t’i dhuron futbolli. Mançester Sitit i iku nga duart një ndeshje që duhej ta kishte fituar thellë, e veç kësaj humbi dy prej lojtarëve kryesorë, Aguero-n e Fernandinho-n, të nxjerrë me të kuqe kur loja i kishte kaluar me kohë 90 minutat.
Deri në minutën e 60-të, kur do të barazonte Diego Costa, në fushë ligjin e bënin lojtarët e Mançesterit. Ata do të kalonin në epërsi në fundin e pjesës së parë me një autogol të Cahill-it, por gjer atëherë kishin patur mjaft raste.
Më i fundit që do të kishte një mundësi të artë për të shënuar do të ishte De Bruyne, që bën të pamundurën duke goditur traversën me portën bosh e duke e nxjerrë topin jashtë.
Diego Costa, Willian e Hazard do të shënonin të tre me kundërsulme, për ta përmbysur lojën e për t’i dhënë Çelsit fitoren 1-3. Një fitore që e ngjit Çelsin në kuotën e 34 pikëve, çka e mban atë në vend të parë në kampionatin anglez.
Në fund nuk munguan dhe momente tensionimi. Aguero e godet David Luiz-in, dhe situata del jashtë kontrollit. Ai e Fernandinho nxirren jashtë pak para rënies përfundimtare të bilbilit.
Kjo ishte fitorja e shtatë radhazi e Çelsit; për Mançester Sitin është humbja e dytë në 14 javë kampionat. /tesheshi.com/
