Janë luajtur këtë pasdite një numër ndeshjesh të javës së dytë të kampionatit anglez, me rezultatin më befasues atë të Liverpulit, që ka humbur në fushën e Bërnlit.
Fillimisht ka qenë Mançester Siti që ka fituar thellë në transfertë ndaj Stouk Sitit. Edhe pse është pritur një takim më i vështirë për udhëtuesit, fitorja ka rezultuar më e lehtë. 1-4 ka fituar skuadra e Guardiola-s, me dy gola të Aguero-s, e dy të tjerë të Nolito-s. Bojan Krkic e ka shënuar golin e vetëm për vendasit në minutën e 49-të, me 11 metërsh.
Çelsi po ashtu ka fituar në fushën e Uotfordit, duke mbledhur gjashtë pikë të plota pas dy javësh. Londinezët e drejtuar nga Antonio Conte kanë fituar 1-2, me dy golat të realizuar në dhjetë minutat e fundit.
Uotfordi ka kryesuar për 80 minuta, e pikërisht atëherë do të barazonte Batshuayi. Diego Costa i ka dhënë avantazhin Çelsit me golin e tij në minutën e 87-të.
Totenhemi e ka mposhtur ngushtësisht Kristëll Pallasin, 1-0. Wanyama ka qenë shënuesi i golit të vetëm.
E papritur humbja e Liverpulit vetëm një javë pasi fitoi bindshëm ndaj Arsenalit. Bërnli vendas i ka pritur miqtë me këmbët e para, duke kryesuar 2-0 që në minutën e 37-të. Vokes realizoi në minutën e 2-të, e më pas e thelloi rezultatin Gray.
Shifrat nuk do të ndryshonin më, me Liverpulin që merr shuplakën e parë në startin e sezonit.
Nga kjo javë e dytë e Premier League-s janë për t’u luajtur dhe tre takime të tjera, mes të cilëve Lestër Siti – Arsenal, që nis në 18:30. /tesheshi.com/
