E mbarë ka qenë kjo pasdite për Çelsin e Arsenalin, që në ndeshjet e tyre të javës së tetë të kampionatit anglez kanë dalë të fituar.
Çelsi ka mposhtur 3-0 kampionët në fuqi të Lestër Sitit. Diego Costa, Hazard dhe Moses kanë qenë shënuesit për londinezët e Antonio Conte-s.
Paraqitje mediokre ka qenë ajo e pjesës së parë e Lestërit të drejtuar nga një tjetër italian, Claudio Ranieri. Një pjesë e dytë më e mirë, por që gjithsesi e pasuksesshme, pasi nuk është mundur të shmanget humbja, e katërta në tetë javë.
Arsenali ka fituar 3-2 ndaj Suonsi Sitit, duke iu bashkangjitur Mançester Sitit në kryesimin e Premier League-s. Walcott i ka shënuar dy prej golave për topçinjtë, me të tretin që mban firmën e Mesut Özil-it.
Dramë në përballjen Mançester Siti – Everton. E mbyllur 1-1, kjo ndeshje do të kujtohet për dy 11-metërshat e humbur nga vendasit. Fillimisht ka gabuar De Bruyne në minutën e 43-të, për t’i ardhur radha Sergio Aguero-s në minutën e 70-të. E dyta penallti e humbur nga argjentinasi, që të njëjtën gjë bëri dhe me përfaqësuesen e vendit të tij në takimin ndaj Paraguajit.
Fitorja më e thellë e ditës qe ajo e Bornmëthit ndaj Hall Sitit: 6-1. /tesheshi.com/
