Tashmë është periudha e transferimeve dhe diçka e tillë prek thuajse të gjithë repartin e prapavijës për formacionin e De Biazit. Me përjashtim të Ansi Agollit, i cili ka rinovuar kontratën me Karabakun edhe për një sezon, lojtarët e tjerë të mbrojtjes janë në kërkim të destinacioneve të reja, shkruan Panorama Sport.
Kapiteni Cana është thuajse i larguar nga Lacio dhe ditët në vijim do të bëjnë që ai ta zyrtarizojë divorcin me bardhekaltrit me kosto zero për skuadrën e re që do të kërkojë të sigurojë kartonin e tij.
Elseid Hysaj është një tjetër nga lojtarët që ka fituar një vend në formacionin titullar të Shqipërisë dhe, me paraqitjen që bëri në sezonin debutues në Serinë A, është një nga lojtarët e kërkuar në Itali dhe jo vetëm.
Duke qenë se Mavraj është i dëmtuar, së fundmi ishte Ajeti që u provua në vendin e tij përballë Francës. Një tjetër mbrojtës pa ekip, pasi e ka përfunduar aventurën e tij me Bazelin.
Për të mos përmendur edhe Andi Lilën, që është një lojtar i lirë, por ky i fundit është edhe një alternativë për mesfushën. /tesheshi.com/
