Një zhvillim i rëndësishëm politik ka ndodhur gjatë ditës së djeshme kur është mbledhur grupi parlamentar i Partisë Demokratike.
Lulzim Basha ka hyrë në takim me një propozim që e konsideron që ta përdorë si kartë të rëndësishme për të marrë pasaportën morale të munduar, që ka sot partia e drejtuar prej tij.
Dhe bëhet fjalë për nisjen e valës së arrestimeve të mëdha të “peshqve të mëdhenj” që pritet të nisë nga ana e SPAK-ut, ndoshta në janarin 2018.
Lulzim Basha ka propozuar që të shkojë në seancës e të enjte me një amandament ku të heqë edhe pengesën për arrestimin e deputetëve dhe ministrave nga ana e prokurorisë.
Por kanë qenë njerëz të rëndësishëm në PD, kryesisht ish-ministra që e kanë kundërshtuar duke paralajmëruar sipas tyre një “hakmarrje” të Edi Ramës.
Deputetët që e kanë kundërshtuar propozimin e Bashës janë pjesëtarë të lobit të ish-kryeministrit Sali Berisha dhe përbëhet nga nënkryetari i Parlamentit, Edi Paloka; deputeti Genti Strazimiri; ish-ministri i Mbrojtjes, Fatmir Mediu dhe ish-Ministri i Brendshëm, Flamur Noka.
Sipas këtyre deputetëve, lejimi i arrestimit të lehtë “do të shfrytëzohet nga Partia Socialiste dhe kryeministri Rama për hakmarrje politike dhe shou mediatik ndaj shumë prej deputetëve të PD-së”.
Siç mësohet dje nuk është shkuar me një vendim, por ky propozim do të shqyrtohet edhe në mbledhjen e ardhshme të grupit parlamentar, përpara se të kalohet në një vendimmarrje për të hartuar një nismë konkrete ligjore.
Ky qëndrim i ish-ministrave të PD-së vjen pikërisht pas një situate ku Prokuroria ka dërguar një kërkesë për arrestimin e Saimir Tahirit, ndërkohë që për 4 vjet ka mbyllur gjithsej 20 dosje të ish-qeveritarëve.
Kjo, që nga 21 janari, rruga Durrës-Kukës e deri tek akuzat ndaj Arben Imamit, Ridvan Bodes etj.
Erion Veliaj ka dërguar në Prokurori disa denoncime për ndërtime të paligjshme për nën administën e Bashkisë së Tiranës së drejtuar nga Lulzim Basha, por që është mbyllur.
Sakaq, ministria e Energjisë Damian Gjiknuri paditi disa zyrtarë, mes të cilëve Genc Rulin e Florion Mimën, por çështja u pushua. Rasti tjetër më flagrant është ai i Arben Imamit. Ai u padit 4 herë në prokurori dhe të katërta herët ja hodhi paq, edhe pse pati akuza për abuzime me tendera dhe me pajisjen e përgjimit. Një tjetër dosje që u mbyll është ajo e paraqitur nga Ditmir Bushati për Marrëveshjen e Ujrave me Greqinë.
Organi i akuzës doli në përfundimin se nuk kishte vepër penale. Momentalisht prokuroria ka në dorë një dosje voluminoze për aferën me CEZ. Kuvendi ka paditur Sali Berishën dhe djalin e tij, por mësohet se dhe kjo dosje është drejt mbylljes.
Pafajësia e ish-Guvernatorit Ardian Fullani është më emblematikja pasi Prokuroria e braktisi hetimin dhe nuk e çoi për rekurs.
Më 23 dhjetor 2015, Fullani fitoi pafajësinë dhe në Gjykatën e Apelit, ndërsa aty u rrëzua kërkesa e prokurorisë për dënimin e tij. Por zyra e shtypit tha se do bëhet rekurs, gjë që nuk ndodhi kështu, edhe pse e ka detyrim kushtetues. Madje Llalla në një intervistë televizive justifikoi veten duke thënë se nuk kishte prova të mjaftueshme për vjedhjen në bankë dhe skandalin me ish-hotel Dajtin.
Në total janë rreth 40 dosje të bujshme që janë në zyrën e Llallës apo vartësve të tij, ku 15 i ka çuar KLSH, teksa në total janë 51 kallëzime, 47 i ka bërë ILDKP, ndërsa 11 dosje të tjera janë mbyllur nga Llalla. Pra në total janë 73 dosje me zyrtarë të nivelit të lartë .
Disa nga dosjet që ndodhen në zyrën e Adriatik Llallës, janë dërguar nga kreu i KLSH, Bujar Leskaj. Vetëm në dy vitet e fundit, 2014-2015 janë kallëzuar në prokurori, përfshirë dhe Prokurorinë e Përgjithshme, rreth 300 zyrtarë, mes tyre edhe të nivelit të lartë. /tesheshi.com/
