Çelsi pret sonte Barcelonën në “Stamford Bridge”, në një tjetër përplasje mes këtyre skuadrave në Champions League.
Takimi është për një të tetat, dhe do të gjykohet nga një treshe turke, me kryesor të mirënjohurin Cüneyt Çakır.
Antonio Conte e ka pranuar se Barcelona është favorite në këtë takim.
“Eshtë një sfidë e madhe për ne teksa do të luajmë ndaj një prej ekipeve më të mira në botë. Nuk ka për të qenë e lehtë, pasi përballemi me një ekip me lojtarë të mëdhenj, si Messi, Suarez dhe Iniesta, por ata janë po ashtu një skuadër shumë e fortë si grup.”
Në pozita jo të mira te Çelsi për shkak të luhatjeve të shpeshta në rezultate, Conte ka pohuar para ndeshjes së sotme se ndaj Barcelonës kërkohet të vuash për t’ia dalë me sukses.
“Ne duhet të jemi ambiciozë, të luajmë futbollin tonë. Duhet të jemi gati të vuajmë pa top dhe të jemi të ngjeshur. Nuk jemi favoritë në letër, por jemi të motivuar për ta luajtur këtë ndeshje.”
Homologut të tij, trajnerit të Barcelonës, Ernesto Valverde, i është kujtuar në konferencën e shtypit se Messi nuk ka shënuar kurrë ndaj Çelsit.
“Nuk jam i sigurt nëse faktet e së shkuarës kanë vlerë për diçka, por e di se është një ndeshje e rëndësishme për çdokënd, për Messi-n, për mua dhe për çdonjërin te Barcelona. Mbase Messi nuk ka patur fat ndaj Çelsit, por kjo i përket së kaluarës.”
Sonte luhet dhe një tjetër takim i një të tetave të Champiosn League-s, Bajern i Mynihut – Beshiktash. /tesheshi.com/
