Policia çeke njoftoi se ndërhyri të enjten pas orës 15:00 për shkak të të shtënave në Fakultetin Filozofik të Universitetit Charles, në sheshin Jan Palach.
Policia më pas raportoi se sulmuesi ishte “eliminuar”.
Shefi i policisë Martin Vondrasek tha se autoritetet u informuan më herët gjatë ditës se burri mund të ishte nisur për në Pragë nga qyteti i tij në distriktin Kladno, afër kryeqytetit çek, me qëllimin për të vrarë veten.
Jo shumë kohë pas kësaj, babai i sulmuesit u gjet i vdekur.
Një krim i tmerrshëm i planifikuar
“Ne kemi informacion të pakonfirmuar nga një profil në një rrjet social se ai dyshohet se ishte frymëzuar nga një sulm terrorist në Rusi në vjeshtën e këtij viti,” u tha Vondrasek gazetarëve, duke shtuar se sulmuesi posedonte disa armë zjarri.
“Ishte një akt i tmerrshëm i planifikuar paraprakisht, i cili filloi në rrethin Kladno dhe përfundoi këtu,” shtoi ai.
Po hetohet nëse sulmuesi u vra nga një plumb policie apo u vetëvra, tha Vondrasek.
Policia ndaloi hyrjen në shesh dhe në zonën pranë godinës së Universitetit Charles, e cila ndodhet në qendër të qytetit.
Universiteti Charles ndodhet në pjesën e vjetër të qytetit, rreth 500 metra nga Ura historike e Charles.
Në dhjetor 2019, një sulmues 42-vjeçar vrau gjashtë persona në një dhomë pritjeje spitali në qytetin lindor çek të Ostravës, përpara se të ikte dhe të bënte vetëvrasje.
Në vitin 2015, një burrë vrau tetë persona dhe më pas veten në një restorant në Uherski Brod. /tesheshi.com/
