Mbi një milion shpërndarje dhe më shumë se dy milion like (mes së cilëve edhe ai i Hillary Clinton) ka marrë një postim në Facebook, i cili sulmon fare hapur Donald Trump. Ai që e ka shkruar është gazetari amerikan Brandon Stanton, i cili ka publikuar disa rreshta në faqen “Humans of New York” në rrjetin social. Akuzat? Nxitje e racizmit, urrejtjes, zemërimit ndaj të huajve.
Ja letra që i shkruan gazetari kandidatit për kreun e Shtëpisë së Bardhë:
Një letër e hapur për Donald Trump;
Zoti Trump,
U mundova shumë të mos jem në anën politike. Kam refuzuar disa herë të intervistoj disa nga kolegët tuaj kandidatë. Nuk kam si qëllim të fitoj ndonjë emër të mirë duke mos mbajtur asnjë anë në zgjedhje. Mendova: “Ndoshta koha nuk është tani”. Por kuptova se nuk ka asnjëherë një kohë të duhur për t’iu kundërvënë dhunës dhe paragjykimeve. Koha është tani. Pasi si miliona amerikanë, edhe unë kam arritur të kuptoj se kundërshtimi ndaj teje nuk është më një vendim politik. Është moral.
Kam parë imazhet e tua raciste në Twitter. Kam parë në Twitter edhe gënjeshtrat raciste. Kam pritur edhe 48 orë të flisnit për supremacinë e racës së bardhë. Ju kam parë se si keni inkurajuar me shumë dëshirë dhunën dhe se si keni premtuar se “do të paguani tarifat ligjore të atyre që kryejnë akte dhune në emrin tuaj”. Kam parë se si tregoni për përdorimin e torturave dhe vrasjes së familjeve të terroristëve. Ju kam parë të tregoni me dëshirë histori të ekzekutimit të myslimanëve me plumba dhe lumenj gjaku. Ju kam dëgjuar teksa krahasoni refugjatët me gjarpërinjtë, teksa shpreheni se “Islami na urren ne”.
Unë jam një gazetar zoti Trump. Gjatë dy viteve të fundit kam realizuar shumë intervista me qindra myslimanë në rrugët e Iranit, Irakut dhe Pakistanit. Kam intervistuar gjithashtu qindra refugjatë nga Siria dhe Iraku në shtatë shtete të ndryshme, ndaj mund t’ju them se i vetmi i urryer jeni ju.
Ata që kanë mbajtur sytë hapur nuk do t’ju lejojnë të shfaqeni sërish. Ju nuk jeni një njeri i bashkimit. Ju nuk jeni një njeri presidencial. Ju nuk jeni një viktimë e zemërimit të madh që për muaj të tërë keni mbjellë. Ju jeni një njeri që keni inkurajuar paragjykimet dhe dhunën në kuadër të fuqisë suaj personale. Edhe pse me shumë mundësi fjalët tuaja do të ndryshojnë gjatë javëve në vijim, ju sërish do të mbeteni ai që jeni.
Sinqerisht,
Brandon Stanton
