Fitorja ka qenë në anën e portugezëve në të parën çerekfinale të Euro 2016-tës. Nuk ka qenë e lehtë ndaj polakëve, që njësoj kanë merituar të kualifikohen për më tej.
Portugalia dhe Polonia kanë luajtur të dytën ndeshje rresht ku është dashur të shkohet në shtesat pesëmbëdhjetëminutëshe. Por ndërsa polakët kanë triumfuar një takim më parë ndaj zvicerianëve me 11-metërsha, këtë herë u janë dorëzuar portugezëve.
Takimi në “Velodrome” të Marsejës do të niste vrullshëm për Poloninë. Mjaftojnë vetëm dy minuta që polakët ta shohin veten në avantazh. Një top në zonën portugeze nga e majta e sulmit, dhe Lewandowski nuk fal: 1-0!
Polakët luajnë shumë më lirshëm, për më tepër që sulmuesi i Bajernit të Mynihut, shënuesi i golit, është në një formë të mirë. Portugezët do të nisin ta marrin veten dalëngadalë, për të barazuar në minutën e 33-të, pas një gjuajtje të fortë të Renato Sanches-it.
Në pjesën e dytë do të ketë ngacmime në të dyja portat, por pa rezultat. Ashtu siç do të ngjasë dhe në shtesat nga pesëmbëdhjetë minuta, ku barazimi 1-1 do të vijojë të mbetet në fuqi.
Për të ardhur te 11-metërshat, ku verdikti është i pashmangshëm. Për portugezët shënojnë të gjithë, Ronaldo, Renato Sanches, Moutinho, Nani dhe Quaresma. Te polakët gjithçka shkon në rregull gjer në penalltinë e tretë: Lewandowski, Milik e Glik tregohen të saktë. Në të katërtën gjuajtje, Blaszczykowski e çon topin në të majtë të portierit Rui Patricio, i cili grushton mrekullisht.
Kaq e pati për polakët. Këtë herë 11-metërshat nuk janë në anën e tyre. 5-3 për portugezët, të cilëve për të dytën ndeshje radhazi fitorja u vuloset nga këmbët e Quaresma-s. Ai do të shënonte ndaj Kroacisë, e po ai do ta gjuante 11-metërshin e fundit ndaj Polonisë.
Portugalia shkon në gjysmëfinale, e pret ta mësojë kundërshtarin nga takimi i së premtes, mes Belgjikës dhe Uellsit. /tesheshi.com/
