Kërcënimi i hapur i presidentit të ri nga selia e partisë së tij se nuk do të dekretojë qeverinë e re e ka lënë të pandjeshëm kryeministrin Edi Rama që garon për një mandat të dytë.
Ai ka vijuar fushatën kundër LSI-së duke porositur të gjithë drejtuesit elektorale të PS-së se ska më koalicion PS-LSI dhe se duhet të punojnë të kthejnë tek PS-ja të gjithë të majtët që rrijnë tek LSI-ja për interes.
Mesazhi që Rama u ka dërguar drejtuesve të Partisë Socialiste nëpër qarqe në 26 vjetorin e themelimit të PS-së:
“Ju lutem nuk duhet të kemi më lajme për LSI-në!
E sotmja ishte një ditë per t’u dhënë të gjithëve mesazhin se LSI nuk ka më shanse të bëjë të tretin të vërtetin, në mënyrë që ju të gjithë ta përdorni këtë në fushatën mikro, me organizim kapilar për të kthyer njerëzit që rrinë me LSI për interes jo për bindje!
Në makro, pra në komunikimin publik duhet të fokusohemi tek mesazhi ynë dhe për reformën e administratës të themi, ne duam të bëjmë dhe duam të kemi mundësinë të zgjedhim më të mirët!
Kaq dhe fokusin tek vetingu, ekonomia, punësimi e me radhë në mesazhin tonë… Forca!“- shkruan Rama. /tesheshi.com/
