Forma e disa iftareve me pako ushqimore të tipit catering, duket se ka implikuar fushatën zgjedhore të këtoditshme, në prag të së dielës së votimit.
Kështu, një ditë më parë në Vaqar, ka patur një përplasje mes dy personave që thuhet se po shpërndanin pako ushqimore të dhëna nga Fondacioni Firdeus i imam Elvis Naçit, me një grup të PD-së, mes të cilëve kreu i FRD-së Belind Këlliçi dhe ish-kreu i Policisë Bashkiake në kohën e Bashës, Florenc Hoxha, i njohur për incidente të shumta, politike dhe jopolitike.
Sipas PD-së, ato po shpërndanin ushqime në këmbim të votës, por personi i sulmuar, Bledar Goga, zyrtar në Njësinë Administrative Vaqarr, në denoncimin e rastit ka thënë se ata kishin marrëveshje me Fondacionin Firdeus për shpërndarje iftaresh.
Pra, kateringu ka qenë iftar e jo ushqim politik.
Ka reaguar dhe Rama ndaj rastit, duke shkruar:
“Ndalimi i dhunshëm i disa iftareve mbrëmë nga paramilitarët e ‘mbrojtjes së votës’ është një çmenduri e padëgjuar!
Thirrja ime është qetësi, qetësi, qetësi, durim, durim, durim, besim, besim, besim!
E diela do të shënojë fundin e mallkimit të së shkuarës mbi rrugën e shqiptarëve”. /tesheshi.com/
