Universitetet në vend sot hapën dyert për mijëra studentë të rinj dhe vazhdues të studimeve në degë të ndryshme. Me këtë rast, kryeministri Edi Rama vizitoi Universitetin e Mjekësisë, i cili sivjet disponon kushte më të mira.
“Studentët që nisin sot vitin kanë në dispozicion kushte më të mira. Do të bëjmë gjithçka që QSUT të mbyllë procesin e transformimit. Së shpejti do të çelet dhe spitali i ri modern i kirurgjisë i cili do të vendosë një standard të ri. E rëndësishme që ndërveprimi mes nesh të vazhdojë përmes Ministrisë së Shëndetësisë.”, deklaroi Rama.
Ai shtoi se do të vazhdoj të angazhohet për përfshirjen e studentëve ekselent në administratë, numër që tani është mjaft i madh krahasuar me të kaluarën.
Nga ana tjetër, me vitin e ri akademik u kap dhe opozita, duke hedhur akuza për një “sistem të degraduar”.
Në ditën e parë të Universitetit, kryetarja e LSI-së, Monika Kryemadhi, thotë se janë të shumtë dhe ata nxënës, që si rrjedhojë e një sistemi të degraduar nuk ja dolën ndoshta as të regjistrohen në universitet.
Duke sjellë në vëmendje protestën e studentëve dhjetorin e kaluar, Kryemadhit thotë se ajo nuk mundi që të ndryshonte gjendjen në të cilin ndodhet arsimi në Shqipëri.
Kryemadhi thotë se ky vit akademik nisi me një ngjarje skandaloze, që sipas saj, dhunon rëndë autonominë universitare.
Sipas kryetares së LSI-së, ishte skandaloze grabitja që qeveria i bëri Kopshtit Botanik, të vetmit laborator natyror që ka sot vendi. /tesheshi.com/
