Mitrovica, qyteti simbol i Kosovës, shënoi dje të parin investim të huaj në gjithë këto vite, atë të hapjes së një fabrike kërpurdhash.
Në fshatin Gushavc u bë inaugurimi i fabrikës së quajtur “Hirano Mushroom”, fabrikë kjo që është më e madhe në Evropë për prodhimin e kërpudhave japoneze ‘Shiitake’.
“Që nga sot, jemi prodhuesit më të mëdhenj në Evropë për prodhimin e kërpurdhave japoneze “Shiitake’, projekt ky që deri më tani ka kushtuar mbi 5 milion euro. Shitja e prodhimit është e garantuar në tregun evropian”, ka thënë drejtori i fabrikës, Valdrin Lluka.
Në anën tjetër, lideri i AKR-së, Behgjet Pacolli, tha se “edhe përkundër kritikave që i janë bërë, kryetari të Komunës së Mitrovicës Agim Bahtiri, unë kam besuar në të dhe projektet e tij dhe rezultatet po shihen”.
Pacolli gjatë fjalimit të tij ka ironizuar ish-zëvendëskryeministrin e Kosovës, Bujar Bukoshi, që në një mbledhje të qeverisë së shkuar pat theksuar: “na lodhët me paqurka (këpurdha), e kisha dashur që një herë edhe t’i shijoj ato për të cilat po flisni.
“Ne po përurojmë një fabrikë, e cila është vetëm fillimi dhe shumë shpejt kjo zonë do të shndërrohet në zonë të kërpudhave”, tha Pacolli, i cili e ftoj Bujar Bukoshin të vijë t’i shijoj kërpudhat me të cilat dikur është tallur.
Pacolli, duke marrë shkas nga ndërtimi i kësaj fabrike, kritikoi qeverinë e Kosovës për mospërkrahje të bizneseve, sepse tha se ajo duhet të turpërohet për këtë.
“Në fillim askush nuk e ka besuar se mund të realizohet ky projekt, por tani kjo është realitet”, ka thënë kryetari i Komunës së Mitrovicës, Agim Bahtiri.
“Me gjithë veshtërsitë që kemi pasuar në sigurimin e truallit për këtë ndërmarrje, ne ia dolëm të jemi eksportuesit më të mëdhenjt të këpurdhave për tregun evropian”, shtoi Bahtiri.
Ai ka shtuar se deri në vitin e ardhshëm kur pritet të përfundojë i tërë projekti për prodhimin e këpurdhave në veri të Mitrovicës dhe Kosovës, priten të punësohen 800 punëtorë.
Në anën tjetër, ambasadori i Shqipërisë në Kosovë Qemal Minxhozi, duke iu drejtuar të pranishmëve ka theksuar se kërkon nga këta investitorë që në të ardhmen të shikojnë mundësit e tyre të investimit të këtij lloji edhe në Shqipëri.
“Vetëm me investime të këtij lloji dhe me punë, Shqipëri dhe Kosova munde t’i bashkohen familjes së madhe evropiane”, tha Minxhozi.
Kështu, nga “qyteti i minatorëve”, Mitrovica mundet të quhet këtej e tutje dhe “qytet kërpurdhash”, gjithnjë nëse prodhimet e fabrikës së re do kenë nam në tregun europian. /tesheshi.com/
