E ka aplikuar Rama, dje në opozitë por dhe më vonë në pushtet. Bëhet fjalë për letrat e hapura adresuar rivalëve politikë për çështje të caktuara.
Por së fundi kjo forma komunikative, që në thelb është dhe sfiduese politikisht, është aplikuar dhe nga Basha. Ky i fundit i është drejtuar Ramës me një të tillë, për t’i shprehur gadishmërinë karshi propozimit amerikan për zgjidhjen e ngërçit politik.
“Në emër të opozitës ju informoj se që prej ditës së djeshme në orën 12:00, opozita ka pranuar pa kushte propozimin e integruar të prezantuar si zgjidhje për krizën politike nga nd/zv Sekretari i Shtetit, Hoyt Yee.
Duke konfirmuar pranimin e plotë të propozimit të integruar, ju bëjmë thirrje që edhe ju të konfirmoni publikisht pranimin pa kushte të propozimit të SHBA, për t’i hapur rrugë zbatimit të kësaj pakete me qëllim garantimin e kushteve për proces zgjedhor të lirë dhe të ndershëm për qytetarët shqiptarë.
Duke shprehur bindjen se propozimi i SHBA përbën rrugën e duhur për zgjidhjen e krizës, konfirmoj gatishmërinë e opozitës për implementimin e plotë të saj pa vonesa”, thuhet në letrën e Bashës.
Siç mund të nuhatet, kjo është një formë për t’ja lënë “topin në derë” kryeministrit, në atë që përbën një shah të paevitueshëm politik. /tesheshi.com/
