Nga Blendi Gashi
Smogu i pazakontë në Prishtinë, ka bërë bashkë si rrallëherë deputetët kosovarë të cilët pos shqetësimit kanë bërë dhe propozime për tejkalimin e situatës.
“Nuk na duhen masa kozmetike. Qytetet tona i kemi helmuar. Prishtina është bërë qytet i pajetueshëm por edhe Obiliq, Fushë Kosova e Mitrovica. Jeta në Prishtinë është ngulfatur”, tha kryeparlamentari Kadri Veseli.
“Të krijohet buxheti veçantë për përkrahjen e investimeve të qytetarëve dhe bizneseve, me të cilat ulen shpenzimet e jetesës dhe rritet cilësia e shëndetit duke investuar në izolimin e shtëpive dhe ndërtesave të paizoluara në Kosovë. Për këtë, kemi edhe projektin amerikan të MÇ-së, i cili ka ndarë 22 milionë dollarë, ndërsa konsideroj që edhe qeveria e Kosovës duhet t’i ndajë 30 milionë euro për këtë qëllim”, tha Veseli.
Ai po ashtu ka propozuar mbështetjen buxhetore për zhvillimin më të shpejtë të zgjerimit të projektit të ngrohjes përmes koogjenerimit, ndërsa propozoi edhe mbjelljen e drunjve në gjitha komunat e Kosovës, e në veçanti në zonat urbane.
Veseli gjithashtu kërkoi të ndërmerren hapa konkretë për lidhjen në gazsjellës përmes Shqipërisë, që sipas tij i cili krijon mundësinë e përdorimit të gazit me përfitime mjedisore dhe ekonomike.
Deputeti i Lëvizjes Vetëvendosje, Dardan Sejdiu propozoi 5 pika se si mund të dilet nga kriza e ndotjes së ajrit, ku ndër to ishte pakësimi i përdorimit të thëngjillit për ngrohje, apo një flotë e re autobusësh në Prishtinë.
Deputetja e LDK-së, Besa Gaxherri propozoi dhe vendosjen e filtrave në KEK.
Të gjithë i dakortësuan tek nevoja për krijimin e strategjive afatgjata, sidomos me gjetjen e burimeve alternative për ngrohje e konsum. /tesheshi.com/
