Uashingtoni e hedh fajin për konfliktin e fundit ndërmjet policisë së Kosovës dhe serbëve në veri të Kosovës, drejtpërdrejt tek Albin Kurti, i cili arriti të bashkojë demokratët dhe republikanët(amerikanë) në vlerësimin se po rrezikon përpjekjet për arritjen e paqes, shkruan portali brukseli Politico.
“Kryeministri i Kosovës Albin Kurti arriti të pamundurën në politikën amerikane – një konsensus ndërmjet demokratëve dhe republikanëve. Fatkeqësisht për Kurtin, pika e marrëveshjes është se lideri i Kosovës është një politikan kokëfortë dhe ndonjëherë i pamatur që ka minuar përpjekjet e përbashkëta të SHBA-së dhe BE-së për të arritur një zgjidhje të përhershme për paqen ndërmjet Kosovës dhe Serbisë”, shkruan portali i Brukselit.
Situata në veri të Kosovës ka qenë jashtëzakonisht e tensionuar gjatë javëve të fundit.
Në fund të majit, serbët lokalë kundërshtuan marrjen e detyrës nga kryetarët shqiptarë etnikë pas zgjedhjeve lokale në katër komuna veriore ku pjesëmarrja ishte vetëm 3.4 përqind sepse serbët, të cilët përbëjnë shumicën në veri, i bojkotuan ato.
Në përleshjet u plagosën 30 pjesëtarë të forcës paqeruajtëse (KFOR) dhe më shumë se 50 serbë.
Edhe pse Brukseli dhe Uashingtoni i kërkuan Prishtinës dhe Beogradit qetësimin e tensioneve, kjo nuk ndodhi. Tani për tani, duket se aleatët perëndimorë e kanë më shumë inat kryeministrin Kurti.
Incidenti i fundit ka ndodhur kur forcat serbe arrestuan tre policë të Kosovës.
Të gjithëve po e humbet durimi me Kurtin
Politico kujton deklaratën e fundit të ambasadorit të SHBA-së në Serbi, Christopher Hill, i cili vuri në diskutim Kurtin si partner amerikan, si dhe dënimin e mëparshëm të lëvizjeve të qeverisë së Kosovës “të cilat përshkallëzojnë tensionet në veri dhe rrisin destabilitetin”, siç ka shkruar në Twitter Sekretari i Shtetit Antony Blinken.
Portali rikujton gjithashtu se Richard Grenell, i dërguari i posaçëm i SHBA-së për dialogun ndërmjet Serbisë dhe Kosovës në administratën e presidentit Donald Trump, ka thënë se Kurti “i ka treguar gishtin e mesit” presidentit amerikan dhe evropianëve.
Ndërsa Grenell ka qenë prej kohësh kritik ndaj Kurtit, qortimi publik i administratës Joe Biden është gjithsesi “i pazakontë në disa nivele”, vlerëson i njëjti portal.
“Para së gjithash, Kosova ka qenë projekti i preferuar i liderëve demokratë që kur ish-presidenti Bill Clinton udhëhoqi fushatën e suksesshme të NATO-s në vitin 1999 kundër diktatorit jugosllav Slobodan Millosheviç”, shkruan Politiko, duke shtuar se shumë demokratë e shohin Kosovën si një shembull të rrallë të suksesit amerikan në shtetndërtimin.
Së dyti, Hill, një “legjendë diplomatike” në Ballkan që e kupton shtrirjen e “ndikimit malinj” të Serbisë në rajon, beson se Beogradi nuk është fajtor për përshkallëzimin e fundit.
“Edhe BE-ja e ka humbur durimin me Kurtin”, thekson Politico, duke kujtuar se Brukseli ka marrë vendim që të shtyjë vizitat dhe bashkëpunimin financiar me Prishtinën.
Vuçiç nuk është engjëll
Shkrimi thekson se pakkush do të argumentonte se presidenti serb Aleksandar Vuçiç – një lider i fuqishëm me një histori të gjatë të antagonizimit ndaj Perëndimit duke flirtuar me Rusinë dhe Kinën – është një engjëll, por se Serbia mbetet një fuqi në rajon dhe se SHBA e BE dëshiron të sigurojë që ata të mos hyjnë më thellë në sferën e ndikimit rus.
“Në një kohë kur SHBA-ja dhe Evropa janë të fokusuara në zgjidhjen e luftës ruse në Ukrainë, gjëja e fundit që u nevojitet është një tjetër konflikt në kontinent. Kjo duket se është përllogaritja e tyre në një përpjekje për të larguar Kurtin nga pushteti. Pavarësisht nëse kritikat e Kurtit janë të drejta, shpërthimi i fundit në Kosovë është një kujtesë e ashpër e kostos së Perëndimit që ka lënë të ziejë konflikti për vite në rajon”, përfundon Politico. /tesheshi.com/
