Kryetari i Prishtinës, Shpend Ahmeti është cilësuar si një prej figurave të politikës që pritet të shkëlqejnë në vitin 2017 e në vijim. Ai u përzgjodh nga faqja Politico.eu në mesin e 28 njerëzve që po i japin formë dhe po e lëvizin Europën
“Kosova mund të ketë bërë hapa të rëndësishëm drejt njohjes ndërkombëtare me pranimin në FIFA dhe me medaljen e artë olimpike në Rio. Por për Shpend Ahmetin, kryetar të Prishtinës, ndërtimi i shtetit fillon nga baza”, thuhet në përshkrimin e Politico.co.
Si vendimin e tij të parë në postin e kryetarit të Prishtinës, kjo faqe e ka listuar shitjen e Audi Q7 të ish-kryetarit Isa Mustafa, edhe pse në të vërtetë kjo makinë nuk është shitur dhe vazhdon të jetë në garazhet e komunës së Prishtinës.
Ky lajm përveç që ka gëzuar Ahmetin dhe sigurisht drejtuesit e VV-së, por jo vetëm, çuditërisht ka gëzuar edhe një anëtarë të Partisë Demokartike të Kosovës (PDK). Bëhet fjalë për Rexhep Hotin, anëtar i Këshillit të Përgjithshëm të PDK-së, njëherësh edhe zv/ministër në ministrinë e Kulturës, i cili e ka uruar Shpend Ahmetin.
“Urimi im për Shpend Ahmetin në këtë rast është pjesë e një urimi që sjellë reflektim pozitiv dhe inkurajim për klasën politike të pa ngarkuar e ngjyrosur nga barishtet e këqija, që e rrënojnë një qeverisje të mirë, transparente, kreative dhe prosperuese.
E vërteta se ndajmë subjekte të ndryshme, më jep më shumë kurajë për të qenë gjithmonë të bashkërenduar brenda standardeve që kërkon edhe një bashkëpunim i tillë në një shtet demokratik.
Urime dhe shumë fat e suksese, Shpend!”, thuhet në urimin e Hotit./tesheshi.com/
