Policia e Shtetit ka marrë një tjetër njollë në integritetin e saj moral, me një oficer jo të thjeshtë gjobëvënës, më saktë me një shef antidroge, madje në Durrës.
Pra, Shefi i Antidrogës në Policinë e Durrësit, Gazmir Preçi, ra në prangat e bluve ditën e djeshme pasi kishte shtantazhuar pronarin e një klubi nate te “Ura e Dajlanit” se do t’i mbyllte biznesin nëse nuk do i jepte shumën prej 20 mijë euro.
Me shapka dhe pantallona të shkurtra, Agjencia e Mbikëqyrjes Policore i hodhi prangat Preçit i cili akuzohet për “shpërdorim detyre” dhe “korrupsion pasiv i personave që ushtrojnë funksione publike”, duke ia “marrë erëzin” në publik.
Mirëpo edhe pse Policia e konsideron sukses arrestimin e kuadrit të saj, ajo nuk shpjegon se pse Preçi është ngjitur në karrierë teksa ka qenë i njollosur më parë me akuza të rënda për lejim kultivim kanabisi.
Rezulton se në kohën kur ishte shefi i Komisariatit në Policinë e Mallakastrës, Preçi ra në pranga së bashku me disa zyrtarë të tjerë të Policisë së Fierit, pasi kishin lejuar kultivimin e kanabisit në afërsi të Urës së lumit Vjosë, në Poçem.
Por, si duket përfshirja e një shefi Komisariati në një vepër të tillë penale nuk kanë ndikuar aspak që ati të ngjiste shkallët e karrierës, duke u “shpërblyer” me postin si Shef i Antidrogës në Policinë e Durrësit.
Dhe vjen më pas deklarata e ministrit të ri Ervin Hoxha, gjithashtu një ish-kuadër i lartë Policie, i cili rreh gjoksin për këtë rast duke thënë:
“Operacioni i AMP-së, në bashkëpunim me SPAK, është mesazh i qartë për ata punonjës policie të cilitdo niveli qofshin, që do të tentojnë të cenojnë besimin e qytetarëve tek Policia, duke u hequr si padronë të qytetarëve dhe bizneseve, dhe jo si shërbëtorë të ligjit, do të marrin ndëshkimin më të ashpër ligjor.
Mbështes dhe inkurajoj AMP-në dhe agjencitë e tjera ligjzbatuese, si dhe nxis dhe garantoj qytetarët dhe bizneset të denoncojnë raste të tilla, sepse vetëm bashkërisht arrijmë të realizojmë objektivin madhor, për të pasur një Polici sa më profesionale dhe me integritet të lartë moral e ligjor!”.
Mirëpo më parë duhet t’i thotë publikut se për ç’aftësi a moral ku njeri me njollë ui emërua Shef Antidroge në Durrës.
Nëse nuk e thua këtë, nuk vlejnë fare ato që ke thënë. /tesheshi.com/
